பள்ளிக் கல்வித்துறை நடத்தும் தடகள மற்றும் பழைய விளையாட்டுகளுக்கு கருவிகள் தேவையில்லை. வாள்சண்டை பயிற்சிக்கு தேவையான முகக்கவசம், உடல் கவசம், வாள், மற்ற உபகரணங்கள் வாங்குவதற்கு ரூ.25 ஆயிரம் ரூபாய் செலவாகிறது.

ஜிம்னாஸ்டிக்கில் ரிதமிக் பிரிவிற்கான ஆடையின் விலை ரூ.20 ஆயிரம், விளையாட்டு போட்டிக்கான ஆடைக்கும் அதிகம் செலவாகிறது. ஜூடோ போட்டிக்கான முகக்கவசமும் சில ஆயிரங்களைத் தொடுகிறது.

போல்வால்ட்டில் பைபர் போலுக்கு ரூ.20 ஆயிரத்திற்கு மேலாகிறது. வளையும் தன்மை கொண்ட இந்த போல் மூலம், எளிதாக வெற்றியைத் தொடலாம்.

டேக்வாண்டோ, ஜூடோ, ஜிம்னாஸ்டிக்ஸ் போட்டிகளுக்கு தரைவிரிப்பு மெத்தைகள் தேவை. இந்த வசதிகள் எதுவுமே பள்ளிக்கல்வி துறை செய்து தரவில்லை. வாள்சண்டை, ஜூடோ போட்டியில் பங்கேற்கும் ஆர்வமிருந்தும் ஏழை மாணவர்கள் பங்கேற்பதில்லை. வாடகைக்கு வாங்கினாலும் விலை கட்டுப்படியாகாது.

மதுரையில் சமீபத்தில் நடந்த மாநில போட்டிகளில், மெத்தைகள் இன்றி பிற மாவட்டங்களில் வண்டி வாடகைக்கு செலவு செய்து மெத்தைகளை வாங்கி போட்டிகள் நடத்தப்பட்டன.

பள்ளிக்கல்வித் துறை சார்பில், உடற்கல்வி ஆய்வாளர் அலுவலகம் மூலம், போட்டிகளுக்கு தேவையான அளவில் வீரர்களுக்கான உடை, கருவிகள், போட்டிக்கான மெத்தைகளை வாங்கித்தர ஏற்பாடு செய்ய வேண்டும்.