கோவை:
முதுகலை மருத்துவ படிப்புகளுக்கான நீட் தேர்வு, கோவையில் 19 மையங்களில் நடந்தது. 4,393 பேர் விண்ணப்பித்தனர். 4,167 பேர் தேர்வு எழுதினர்; 226 பேர் பங்கேற்கவில்லை.

காலை 09:00 மணி தேர்வுக்கு, 07:00 மணியில் இருந்து தேர்வர்கள் தீவிர பரிசோதனைக்கு பிறகு அனுமதிக்கப்பட்டனர். 12:30க்கு தேர்வு முடிந்தது. தேர்வு ஆன்லைனில் நடந்தது. மொத்தம் 800 மதிப்பெண்களுக்கு நடந்த இத்தேர்வில், ஒவ்வொரு சரியான பதிலுக்கும் 4 மதிப்பெண், தவறான பதிலுக்கு 1 மதிப்பெண் இழப்பு என்ற முறையில் 200 கேள்விகள் இடம்பெற்றன.

கிளினிக்கல், ப்ரீ கிளினிக்கல், பாரா கிளினிக்கல் ஆகிய பிரிவுகளில், விருப்ப உயர்க்கல்வி பாடங்களுக்கு ஏற்ப, தேர்வு வினாக்கள் வடிவமைக்கப்பட்டிருந்தன. கோவையில் எந்த தேர்வு முறைகேடும் நடக்கவில்லை என, ஒருங்கிணைப்பாளர்கள் தெரிவித்தனர்.