பயங்கரவாத நிதி தடுப்பு: மத்திய ஆசிய நாடுகளுக்கு இந்தியா பயிற்சி
பயங்கரவாத நிதி தடுப்பு: மத்திய ஆசிய நாடுகளுக்கு இந்தியா பயிற்சி
UPDATED : பிப் 05, 2026 09:26 PM
ADDED : பிப் 05, 2026 09:28 PM
பயங்கரவாதத்திற்கு நிதி கிடைப்பதைத் தடுப்பதில் உலகளாவிய அளவில் இந்தியா தனது ஆளுமையை மீண்டும் நிலைநாட்டியுள்ளது. நவீன தொழில்நுட்பங்கள் வழியாக பயங்கரவாதிகள் நிதி திரட்டுவதைத் தடுக்க, மத்திய ஆசிய நாடுகளைச் சேர்ந்த அதிகாரிகளுக்குச் சிறப்புப் பயிற்சியை இந்தியா வழங்கியுள்ளது.
இது குறித்த விரிவான தகவல்களை, மத்திய உள்துறை இணையமைச்சர் நித்யானந்த் ராய், மக்களவையில் தெரிவித்தார்.
நோக்கம்
'கிரிப்டோகரன்சி, கிரவுட் பண்டிங் மற்றும் லாப நோக்கற்ற நிறுவனங்கள் மூலம் பயங்கரவாதத்திற்கு நிதியுதவி அளிக்கப்படுவதைத் தடுத்தல்' என்பதே இந்தப் பயிற்சியின் முக்கிய நோக்கமாகும். இன்றைய டிஜிட்டல் உலகில் பயங்கரவாதிகள் பயன்படுத்தும் புதிய யுக்திகளை முறியடிப்பதே இதன் இலக்காகும்.
இந்தப் பயிற்சித் திட்டம், மத்திய அரசின் பல்வேறு துறைகளின் ஒருங்கிணைந்த முயற்சியால் வெற்றிகரமாக நடத்தப்பட்டது. இதில் மத்திய வருவாய்த் துறை, வெளியுறவு அமைச்சகம் மற்றும் தேசிய பாதுகாப்பு கவுன்சில் செயலகம் ஆகிய முக்கிய அமைப்புகள் ஒன்றிணைந்து இத்திட்டத்தைச் சிறப்பாகச் செயல்படுத்தின.
பயிற்சியின் போது, இணையதளங்கள் மற்றும் சமூக வலைதளங்கள் மூலம் சட்டவிரோதமாக நிதி திரட்டுவதைக் கண்டறிதல்; லாப நோக்கற்ற நிறுவனங்கள் என்ற போர்வையில் பயங்கரவாதத்திற்கு நிதி செல்வதைத் தடுக்க வலுவான ஒழுங்குமுறை கட்டமைப்புகளை உருவாக்குதல்; போன்ற சிக்கலான விவகாரங்கள் குறித்து ஆலோசனைகளும் நேரடி விளக்கங்களும் அளிக்கப்பட்டன.
மேலும், இந்தியாவின் முதன்மைப் புலனாய்வு அமைப்புகளான நிதிப் புலனாய்வுப் பிரிவு, அமலாக்கத் துறை, தேசிய புலனாய்வு முகமை ஆகியவற்றைச் சேர்ந்த நிபுணர்கள் தங்களின் அனுபவங்களையும், தொழில்நுட்ப நுணுக்கங்களையும் பகிர்ந்து கொண்டனர்.
எதிர்காலத் திட்டம்
மேலும், டிஜிட்டல் யுகத்தில் பயங்கரவாத அச்சுறுத்தல்கள் எல்லைகளைக் கடந்து வருவதால், சர்வதேச ஒத்துழைப்பு அவசியம் என்பதை இந்தியா வலியுறுத்தி வருகிறது. மத்திய ஆசிய நாடுகளைத் தொடர்ந்து, அடுத்தகட்டமாக 'பிம்ஸ்டெக்' (BIMSTEC) நாடுகளுக்கும், இதே போன்ற திறன் மேம்பாட்டுப் பயிற்சிகளை வழங்க இந்தியா திட்டமிட்டுள்ளது.
