போலீசார் கடுமையாக தாக்கியதில் படுகாயமடைந்த அமினி, 3 நாட்கள் கோமாவில் இருந்த நிலையில், சிகிச்சை பலனின்றி உயிரிழந்தார். இதற்கு நீதி கேட்டும், ஹிஜாப்புக்கு எதிராகவும் நாடு முழுதும் மக்கள் பெரும் போராட்டத்தில் இறங்கினர். பல இடங்களில் போராட்டக்காரர்களுக்கும் போலீசாருக்கும் இடையே ஏற்பட்ட மோதலில் போலீசார், பொதுமக்கள் உட்பட 70க்கும் மேற்பட்டோர் உயிரிழந்தனர்.

இந்நிலையில், மூன்று ஆண்டுக்குப் பின், ஈரானில் அதேபோன்ற அளவில் பெரும் போராட்டம் வெடித்துள்ளது. பணவீக்கத்தால் அத்தியாவசியப் பொருட்களின் விலை விண்ணைத் தொடும் அளவிற்கு உயர்ந்ததும், அமெரிக்க டாலருக்கு நிகரான ஈரான் கரன்சியான ரியாலின் மதிப்பு வரலாறு காணாத அளவு சரிந்ததுமே அதற்கு காரணம்.

ஈரான் மத்திய வங்கியின் கவர்னர் முகமது ரேசா பெர்சின், 2022ல் பதவியேற்றபோது, அமெரிக்க டாலருக்கு நிகரான ரியால் மதிப்பு 4.3 லட்சமாக இருந்தது. ஆனால் நேற்று முன்தினம் அமெரிக்க டாலருக்கு நிகரான ஈரான் ரியால் மதிப்பு 14.2 லட்சமாக சரிந்தது. இது ஈரான் வரலாற்றிலேயே மிகக் குறைந்த மதிப்பாகும்.

மேலும், அந்நாட்டின் விலைவாசி உயர்வு, 42.2 சதவீதமாக உயர்ந்துள்ளது. உணவுப் பொருட்களின் விலை கடந்த ஆண்டைவிட 72 சதவீதமும், மருத்துவப் பொருட்கள் விலை 50 சதவீதமும் அதிகரித்துள்ளன. அதே சமயம் அரசின் 2026 - -27ம் ஆண்டிற்கான புதிய பட்ஜெட்டில் வரிகள் உயர்த்தப்படலாம் என்ற அறிவிப்பும் வணிகர்களிடையே அச்சத்தை ஏற்படுத்தியுள்ளது.

இதையடுத்து ஈரானின் பொருளாதார மையமாகக் கருதப்படும் டெஹ்ரான் கிராண்ட் பஜார் மற்றும் நகர மையத்தில் உள்ள சாடி தெருவில் உள்ள வணிகர்கள், கடைகளை அடைத்து போராட்டத்தில் ஈடுபட்டனர். ஈரானில் 1979ல் நடந்த இஸ்லாமிய புரட்சியில் முக்கிய பங்காற்றிய வணிகர்களும், இதில் கலந்து கொண்டனர்.

ஆரம்பத்தில் பொருளாதாரக் கோரிக்கைகளுடன் துவங்கிய போராட்டம், பின்னர் அரசுக்கு எதிரான முழக்கங்களாக மாறியுள்ளன.

டெஹ்ரான் மையப் பகுதியில் துவங்கிய போராட்டங்கள், இஸ்பஹான், ஷிராஸ், மஷ்ஹத் உள்ளிட்ட பிற நகரங்களுக்கும் பரவியுள்ளது. போராட்டக்காரர்களை கலைக்க பாதுகாப்புப் படையினர், கண்ணீர் புகைக் குண்டுகளை வீசினர். பல இடங்களில் போராட்டக்காரர்களுக்கும் போலீசாருக்கும் இடையே மோதல்கள் ஏற்பட்டன.

ஈரான் அதிபர் மசூத் பெசெஷ்கியான், மக்களின் வாழ்வாதாரமே தன் முதல் முன்னுரிமை என்றும், போராட்டக்காரர்களின் நியாயமான கோரிக்கைகளை கேட்க உள்துறை அமைச்சருக்கு உத்தரவிட்டுள்ளதாகவும் தெரிவித்துள்ளார். இந்த நெருக்கடிக்கு மத்தியில், ஈரானின் மத்திய வங்கி கவர்னர் முகமது ரேசா பெர்சின் நேற்று தன் பதவியை ராஜினாமா செய்தார். அவருக்குப் பதிலாக அப்துல் நாசர் ஹெம்மாட்டி புதிய கவர்னராக நியமிக்கப்பட்டுள்ளார்.