மேற்காசிய பிராந்தியத்தில் இஸ்ரேலுக்கும், லெபானனை கட்டுப் படுத்தும் ஹெஸ்பொல்லா பயங்கரவாதிகளுக்கும் இடையே நீண்ட காலமாக மோதல் நீடிக்கிறது.

கடந்த 2024 செப்டம்பரில், லெபனானில் ஹெஸ்பொல்லா அமைப்பினர் தகவல் தொடர்புக்கு பயன்படுத்திய பேஜர் கருவிகள் அடுத்தடுத்து வெடித்ததில் பலர் உயிரிழந்ததுடன் பலர் காயமடைந்தனர். இந்த தாக்குதலை இஸ்ரேலின், 'மொசாட்' உளவு அமைப்பு நடத்தியது.

இந்நிலையில், ஐ.நா., சபையில் பேசிய இஸ்ரேல் பிரதமர் நெதன்யாகு, ஹமாஸ், ஹெஸ்பொல்லா மற்றும் ஈரானுக்கு எதிராக மேற்கொண்ட ராணுவ நடவடிக்கைகளை ஆதரித்து பேசினார். மேலும் துருக்கி, பிரான்ஸ், பிரிட்டன் மற்றும் நியூயார்க் மேயர் சோஹ்ரான் மம்தானி ஆகியோரையும் அவர் விமர்சித்தார்.

அப்போது, பேஜர் கருவியை காட்டி, ''இந்த பேஜர் கருவி ஹெஸ்பொல்லா பயங்கரவாதிகளுக்கு நிச்சயம் நினைவிருக்கும்,'' என எச்சரிக்கும் வகையில் அவர் குறிப்பிட்டார்.

அவர் மேலும் பேசியதாவது: மூன்று ஆண்டுகளில், எங்கள் வீரர்கள் ஏழு முனைகளில் போரிட்டுஉள்ளனர். அமெரிக்காவின் நியூ ஜெர்சி மாகாணத்தின் அளவே உள்ள வேறு எந்த நாடாவது, மூன்று ஆண்டுகளாக ஏழு முனைகளில் போரிட முடியுமா? ஈரானின் கொலைகார சர்வாதிகார அரசு, அணு ஆயுதங்கள் உருவாக்குவதை தடுப்பேன் என, உறுதி அளித்திருந்தேன்.

எங்களை உலக வரைபடத்தில் இருந்து அழிக்க ஈரான் திட்டமிட்டது. மாறாக, அமெரிக்காவுடன் இணைந்து அந்நாட்டை கடுமையாக தாக்கினோம். இவ்வாறு அவர் பேசினார்.