'கடந்த ஆண்டுகளில் மக்களுக்கு எத்தனை நலத்திட்டங்களை கொண்டு வந்தோம் என சொல்லி வெற்றி பெற முடியாது' என்பதை இந்த தேர்தலில் கண்டுகொண்டார் மோடி. எனவே, தன் நிலைப்பாட்டை மாற்றிக் கொள்ள தயாராகி விட்டார்.

மஹாராஷ்டிராவில், தற்போது பா.ஜ., - -ஏக்நாத் ஷிண்டேவின் சிவசேனா, அஜித் பவாரின் தேசிய வாத காங்., கூட்டணி அரசு உள்ளது. 288 தொகுதிகளை கொண்ட மஹாராஷ்டிரா சட்டசபையின் பதவிக்காலம், இந்த ஆண்டு அக்டோபரில் முடிவடைகிறது; அதற்கு முன் தேர்தல் நடைபெறும்.

இந்நிலையில், மஹாராஷ்டிராவில் பட்ஜெட் சமீபத்தில் தாக்கல் செய்யப்பட்டது. அதில், '21 - 60 வயது வரையுள்ள மகளிருக்கு மாதம் 1,500 ரூபாய் உதவித்தொகை; விவசாயிகளுக்கு இலவச மின்சாரம்; பொருளாதாரத்தில் பின்தங்கிய குடும்பத்தில் உள்ள மாணவியரின் மேல்படிப்பிற்கு அரசு செலவு செய்யும்' என, பல இலவசங்களை வாரி வழங்கியுள்ளது. 'ஏற்கனவே கூட்டணியில் உள்ள அஜித் பவாருடன் பிரச்னை, அப்படியிருக்க இந்த இலவசங்கள் பா.ஜ., கூட்டணி அரசுக்கு உதவுமா?' என, கேள்விகள் எழுப்பப்படுகின்றன.