ADDED : ஏப் 25, 2024 12:26 AM

சென்னை: உயிருக்கு ஆபத்தை விளைவிக்கும் உணவு பொருட்களை விற்பனை செய்தால், 10 ஆண்டு சிறை தண்டனை விதிக்கப்படும் என, உணவு பாதுகாப்பு துறை எச்சரித்துள்ளது. இதற்கிடையே, 'திரவ நைட்ரஜன்' பயன்படுத்தி தயாரிக்கப்படும் உணவு பொருட்களை தடை செய்ய வேண்டும் என்ற கோரிக்கை எழுந்துள்ளது.
கர்நாடகா மாநிலம், தாவணகெரேவில் 'ஸ்மோக் பிஸ்கெட்' சாப்பிட்ட சிறுவன், கடுமையான வலியில் துடிதுடித்த வீடியோ இணையத்தில் வெளியாகி அதிர்வலைகளை ஏற்படுத்தியது. இதற்கிடையே, 'ஸ்மோக் உணவு வகைகளை குழந்தைகள் உட்கொள்ள வேண்டாம். அவை உயிருக்கு ஆபத்து ஏற்படுத்தும் என, தமிழ்நாடு உணவு பாதுகாப்பு துறை அதிகாரிகள் எச்சரித்துள்ளனர்.
இதுகுறித்து, உணவு பாதுகாப்பு துறை அதிகாரிகள் கூறியதாவது:
'திரவ நைட்ரஜன்' வாயிலாக தயாரிக்கப்படும், ஸ்மோக் வகை உணவுகள் உயிருக்கு ஆபத்தை விளைவிக்கக் கூடியவை. அதீத குளிர் காரணமாக இவை சுவாசப்பாதை, உணவுப்பாதையை உறைய வைத்துவிடும். எனவே, திரவ நைட்ரஜன்களை, உணவு பொருட்களோடு பயன்படுத்தக்கூடாது.
இந்த உணவு வகைகள், குழந்தைகள் முதல் பெரியவர்கள் வரை, பாதிப்பை ஏற்படுத்தும். கண் பார்வை பாதிப்பு, பேசும் திறன் பாதிப்பு மற்றும் உயிருக்கும் ஆபத்தாக அமையும்.
எனவே, தமிழகத்தில், திரவ நைட்ரஜன் பயன்படுத்தி பிஸ்கட், பீடா, ஐஸ்கிரீம் போன்ற உணவு பொருட்கள் விற்பனை செய்யும், ஹோட்டல்கள், பார்கள் உள்ளிட்டவை கணக்கெடுக்கும் பணி துவங்கப்பட்டுள்ளது.
உயிருக்கு ஆபத்தானதாக உணவு வகை இருந்தால், அதை விற்பனை செய்பவர்கள் மீது 10 ஆண்டு வரை சிறை தண்டனை மற்றும் 10,000 ரூபாய் அபராதம் விதிக்கப்படும். எனவே, வியாபாரிகள், பொதுமக்களுக்கு ஆபத்தை விளைவிக்கும் உணவு பொருட்கள் விற்பனை செய்வதை தவிர்க்க வேண்டும்.
திரவ நைட்ரஜன் உணவு பொருளால் உயிருக்கு ஆபத்து இருக்கிறது. இதுவரை உயிரிழப்புகள் இல்லை. அதை தடை செய்வது குறித்து அரசு தான் முடிவெடுக்க வேண்டும்.
இவ்வாறு அவர்கள் கூறினர்.
