தலைமைச் செயலக வளாகத்தில், அவர் அளித்த பேட்டி:

காஞ்சிபுரம் மாவட்டத்தில் உள்ள, ஸ்ரீசன் மருந்து நிறுவனத்தில், தயாரிக்கப்பட்ட, இருமல் மருந்து குடித்து, மத்திய பிரதேசம் மற்றும் ராஜஸ்தான் மாநிலங்களைச் சேர்ந்த 26 குழந்தைகள்இறந்தனர்.

இந்நிறுவனத்தில், கடந்த இரண்டு ஆண்டுகளாக, தமிழக மருத்துவத்துறை, ஆய்வு மேற்கொள்ளவில்லை. அரசின் அலட்சியம் காரணமாக, 26 பச்சிளம் குழந்தைகள் உயிரிழந்துள்ளன.

அதேபோல, சிறுநீரக முறைகேடு தொடர்பாக, தமிழக அரசிடம், எழுப்பிய கேள்விகளுக்கு, முறையான பதில் கிடைக்கவில்லை. இந்த விவகாரத்தில், இடைத்தரகர் மட்டுமே கைது செய்யப்பட்டுள்ளார்.

சம்பந்தப்பட்ட மருத்துவமனையின் மீது எந்தவித நடவடிக்கையும் இல்லை. தி.மு.க.,- எம்.எல்.ஏ.வுக்கு, சொந்தமான மருத்துவமனைஎன்பதால், நடவடிக்கை எடுக்கப்படவில்லை.

அ.தி.மு.க., ஆட்சியில், மத்திய திட்டங்கள் நிதியாக, 2016 - 21ம் ஆண்டில், ஒரு லட்சத்து 18,245 கோடி ரூபாய் பெறப்பட்டது. தி.மு.க. ஆட்சியில் ஒரு லட்சத்து 42,499 கோடி ரூபாய்பெறப்பட்டுள்ளது.

அ.தி.மு.க., ஆட்சியில் ஐந்து ஆண்டுகளில், 2 லட்சத்து 51,835 கோடி ரூபாய்; தி.மு.க ஆட்சியில் 3 லட்சத்து 75,272 கோடி ரூபாய் வருவாய் கிடைத்துள்ளது. தி.மு.க. ஆட்சியில் வருவாய் அதிகம்; அதே நேரம் கடனும் அதிகம். ஆனால், திட்டம் ஒன்றும் இல்லை.

'பாக்ஸ்கான்' நிறுவனம், தமிழகத்தில், 15,000 கோடி ரூபாய் முதலீடு செய்துள்ளதாக, அமைச்சர் ராஜா தெரிவித்தார். அந்நிறுவனம் அவ்வாறு முதலீடு செய்யவில்லை எனக் கூறியுள்ளது. இது குறித்து கேட்டால், பாக்ஸ்கான் துணை நிறுவனங்களில், ஒரு நிறுவனம் முதலீடு செய்திருப்பதாக, அமைச்சர் கூறுகிறார். அந்த நிறுவனம் எது என்பதை, வெளிப்படையாக தமிழக அரசு தெரிவிக்க வேண்டும்.

முதல்வர் ஸ்டாலின், ஜெர்மனி நாட்டிற்கு செல்லும்போது, 'தி.மு.க. ஆட்சிக்கு வந்த பிறகு, 922 புரிந்துணர்வு ஒப்பந்தங்கள் போடப்பட்டுள்ளன; 10 லட்சத்து 62,000 கோடி ரூபாய் முதலீடு ஈர்க்கப்பட்டுள்ளது' என்றார். தமிழகத்தில் இதுவரை, தி.மு.க ஆட்சியில் 60,000 கோடி ரூபாய்தான் முதலீடு வந்துள்ளதாக, மத்திய அரசிடம் இருந்து தகவல் கிடைத்துள்ளது. இவ்வாறு அவர் கூறினார்.