முன்னாள் அமைச்சர் வேலுவிடம் போலீசார் 5 மணி நேரம் விசாரணை
முன்னாள் அமைச்சர் வேலுவிடம் போலீசார் 5 மணி நேரம் விசாரணை
ADDED : ஜூலை 16, 2026 06:22 AM

சென்னை: லஞ்ச ஒழிப்பு போலீஸ் விசாரணைக்கு நேற்று காலை, தி.மு.க., முன்னாள் அமைச்சர் எ.வ.வேலு ஆஜாரானார். அவரிடம், ஐந்து மணி நேரம் விசாரணை நடத்தப்பட்டது.
கரூரில், சாலையே போடாத நிறுவனத்திற்கு, 3.23 கோடி ரூபாய் விடுவித்து மோசடி நடந்து இருப்பதாக, தி.மு.க., முன்னாள் அமைச்சர் எ.வ.வேலு உட்பட, 11 பேர் மீது, லஞ்ச ஒழிப்பு போலீசார் வழக்குப் பதிவு செய்துள்ளனர்.
இவ்வழக்கு தொடர்பாக நேரில் விசாரணைக்கு ஆஜராக வேண்டும் என, அவருக்கு 'சம்மன்' அனுப்பினர். அதை ஏற்று, சென்னை ஆலந்துாரில் உள்ள, லஞ்ச ஒழிப்பு துறை இயக்குநர் அலுவலகத்தில் நேற்று காலை, வேலு ஆஜரானார். அவரிடம், ஐந்து மணி நேரம் விசாரணை நடந்தது.
அதன்பின், வேலு கூறியதாவது: லஞ்ச ஒழிப்பு துறை அதிகாரிகள், என்னிடம் பல கேள்விகள் கேட்டனர். என் மனதில் பட்டதை தெரிவித்துள்ளேன்.
குறிப்பாக, அவர்கள் கேட்ட கேள்விகளுக்கு, நுாறு சதவீதம் உண்மையை சொன்னேன். நான் தெரிவித்த பதில்களை கணினியில் பதிவேற்றம் செய்து கொண்டனர். இது வழக்கமான நடைமுறை தான்.
விசாரணைக்கு எப்போது அழைத்தாலும் தயாராக இருப்பதாக, அவர்களிடம் தெரிவித்துள்ளேன். என் மடியிலும் கனமில்லை; வழியிலும் பயமில்லை. இவ்வாறு அவர் கூறினார்.
