போலி மருந்துகளின் கேந்திரமாக புதுச்சேரியை மாற்றிய அரசை கண்டித்தும், குற்றவாளிகள் மீது நடவடிக்கை எடுக்க வலியுறுத்தியும் தி.மு.க., சார்பில், சட்டசபை முற்றுகைப் போராட்டம் எதிர்க்கட்சித் தலைவரும், தி.மு.க., மாநில அமைப்பாளருமான சிவா தலைமையில் நேற்று முன்தினம் நடந்தது.

இதில், போலீஸ் தடுப்புகளை தாண்டி சட்டசபையை முற்றுகையிட முயன்ற தி.மு.க.,வினரை கைது செய்து அழைத்து சென்றனர்.

இந்நிலையில், தடையை மீறி கூட்டமாக போராட்டத்தில் ஈடுபட்டதாக எதிர்க்கட்சித் தலைவர் சிவா, எம்.எல்.ஏ.,க்கள் சம்பத், செந்தில்குமார், அனிபால் கென்னடி உள்ளிட்ட 249 பேர் மீது பெரியக்கடை போலீசார் வழக்குப் பதிந்து விசாரித்து வருகின்றனர்.