புதுச்சேரியில் நேற்று நடந்த இந்திய தொழில் கூட்டமைப்பின், இரண்டாவது தென்னிந்திய கவுன்சில் கூட்டத்தை துவக்கி வைத்த கவர்னர் கைலாஷ்நாதன் பேசியதாவது;

இந்தியத் தொழில்துறை கூட்டமைப்பு ஒரு நுாற்றாண்டிற்கு மேலாக இந்தியாவின் தொழில்துறை நிலப்பரப்பை வடிவமைப்பதில் தொடர்ந்து முன்னணியில் உள்ளது. புதுச்சேரி, தமிழ்நாடு உள்ளிட்ட தென் மாநிலங்கள் நாட்டின் பொருளாதாரத்தின் முக்கிய அங்கம். இம்மாநிலங்கள், தேசிய மொத்த உள்நாட்டு உற்பத்தி, ஏற்றுமதி, தொழில்துறை உற்பத்திக்கு குறிப்பிடத்தக்க பங்களிப்பை வழங்குகின்றன.

புதுச்சேரி, புவியியல் அளவில் சிறிதாக இருந்தாலும், இந்த வளர்ச்சியில் ஒரு முக்கிய மையமாகும். அதன் கலாசாரம், வலுவான கல்வி நிறுவனங்கள், அமைதியான சூழல் மற்றும் வணிக நட்பு நிர்வாகம், புதுச்சேரி தொழில்துறை மற்றும் பொருளாதார முதலீட்டிற்கான ஒரு முக்கிய இடமாக மாற உள்ளது.

பிரதமர் துவங்கிய மேக் இன் இந்தியா, ஸ்டார்ட் - அப் இந்தியா, டிஜிட்டல் இந்தியா, கேதி சக்தி போன்ற முதன்மை திட்டங்கள் நாடு முழுவதும் தொழில்துறை மீள் எழுச்சியை துாண்டுகின்றன. உலகளாவிய நிச்சயமற்ற தன்மைகளுக்கு மத்தியில் கூட, அந்நிய நேரடி முதலீடு மற்றும் ஏற்றுமதியில் வளர்ச்சி கண்டோம்.

புதுச்சேரி மாநிலத்தில் உள்ள துறைமுகங்கள் வர்த்தகம் மற்றும் கடல் சார்ந்த தொழில்களுக்கு மிகப்பெரிய திறனை வழங்குகின்றன. புதுச்சேரியிலிருந்து பிற முக்கிய நகரங்களுக்கு விமான சேவைகள் தொடங்க நடவடிக்கை எடுக்கப்பட்டு வருகிறது.

தொழில்துறை நலனுக்காக கரசானுாரில் 750 ஏக்கர் நிலம் ஒதுக்கப்பட்டுள்ளது. புதுச்சேரியில் முதலீடு செய்ய வருமாறு முன்னணி தொழிலதிபர்களை கேட்டுக் கொள்கிறேன். நீங்கள் தொழில் துவங்க தேவையான அனைத்து ஒப்புதல்களும் விரைவாக வழங்கப்படும்.

தொழில்துறையின் எதிர்காலம், நமது இளைஞர்களின் எதிர்காலத்தைப் பொறுத்தது. இந்தியாவின் மக்கள்தொகை ஒரு சிறந்த வாய்ப்பாகும். ஆனால் அதுவே ஒரு பெரிய சவாலாகவும் உள்ளது. நவீன பொருளாதாரத்தில் செழிக்கத் தேவையான திறன்கள், அறிவு மற்றும் மனப்பான்மையுடன் ஒவ்வொரு இளம் இந்தியரும் இருப்பதை உறுதி செய்ய வேண்டும். இளைஞர்களை வேலைகளை தேடுவதற்கு மட்டுமல்லாது, வேலைகளை உருவாக்கவும் ஊக்குவிப்போம். இன்று, உலகளவில் போட்டியிடக்கூடிய நிறுவனங்கள் நமக்குத் தேவை, ஆனால் உள்நாட்டிலும் சேவை செய்ய முடியும். சி.ஐ.ஐ., போன்ற நிறுவனங்கள் நெட்வொர்க்கிங் தளங்களாக மட்டுமல்லாமல் மாற்றத்தின் முகவர்களாகவும் இருக்க வேண்டும்.

உலகம் இந்தியாவை நம்பிக்கையுடனும், எதிர்பார்ப்புடனும் பார்க்கிறது. வரலாற்று வாய்ப்பின் தருணத்தில் நாம் வாழ்கிறோம். இந்த சந்தர்ப்பத்திற்கு ஏற்ப உயருவோம். பொருளாதார ரீதியாக சக்தி வாய்ந்ததாக மட்டுமல்லாமல், சமூக ரீதியாகவும் நீதியாகவும், சுற்றுச்சூழல் ரீதியாகவும் நிலையானதாகவும், உலகளவில் மதிக்கப்படும் ஒரு தெற்கு பிராந்தியத்தை உருவாக்குவோம். இவ்வாறு கவர்னர் பேசினார்.

கூட்டத்தில் இந்திய தொழில் கூட்டமைப்பின் தென் மண்டல தலைவர் தாமஸ் ஜான் முத்துாட், துணை தலைவர் ரவிச்சந்திரன், புதுச்சேரி கிளை தலைவர் சமிர் கம்ரா, துணை தலைவர் நடராஜன், மண்டல இயக்குநர் ஜேயேஷ் மற்றும் தமிழ்நாடு, புதுச்சேரி, கேரளா, ஆந்திரா, தெலுங்கானா மற்றும் கர்நாடக மாநிலங்களை சேர்ந்த நிர்வாகிகள் பங்கேற்றனர்.