புதுச்சேரி:'புதுச்சேரிக்கென தனி கல்வி வாரியத்தை உருவாக்க வேண்டும்' என, நாஜிம் எம்.எல்.ஏ., கூறினார்.மான்யக் கோரிக்கை மீதான விவாதத்தில் அவர் பேசியதாவது:நமக்கென தனி கல்வி வாரியத்தை அடுத்த கல்வியாண்டு முதல் அமல்படுத்த வேண்டும். மாநிலப் பல்கலைக் கழகம் எந்த நிலையில் உள்ளது. இங்குள்ள பல கல்லூரிகள் புதுச்சேரி மத்திய பல்கலைக் கழக இணைப்பு பெறவே விரும்புகின்றன. எனவே, மாநில பல்கலைக்கழகம் துவக்குவதற்கான சாத்தியக் கூறுகள் குறித்து ஆராய வேண்டும்.பல பள்ளிகளில் ஆசிரியர் பணியிடங்கள் நிரப்பப்படாமல் உள்ளது. காரைக்காலில் 130 பட்டதாரி ஆசிரியர் பணியிடம் காலியாக உள்ளது. ஒப்பந்த ஆசிரியர்களுக்கு சம்பளத்தை இரு மடங்காக உயர்த்தித் தரப்படும் என கடந்த ஆட்சியில் கூறப்பட்டது. ஆனால், இதுவரை தரவில்லை.தமிழகத்தைப் போல, பட்டதாரி மற்றும் முதுகலை பட்டதாரி ஆசிரியர் பணியிடங்களை வேலை வாய்ப்பக சீனியாரிட்டி அடிப்படையில் நிரப்ப வேண்டும். காரைக்காலுக்கு பள்ளிக் கல்விக்கான இணை இயக்குனர் பதவி கேட்டிருந்தோம்.