ரூ. 1,250 கோடி மதிப்பிலான இந்த பிரம்மாண்ட திட்டம், புதுச்சேரியை தொழில்நுட்ப நிறுவனங்கள் மற்றும் உலகளாவிய முதலீட்டாளர்களுக்கான முதன்மையான இடமாக மாற்றுவதற்காக வடிவமைக்கப்பட்டுள்ளது.

நீண்ட காலமாக, புதுச்சேரியின் திறமையான பொறியியல் மற்றும் ஐ.டி., பட்டதாரிகள் நல்ல வேலை தேடி சென்னை அல்லது பெங்களூரு போன்ற நகரங்களுக்குச் செல்ல வேண்டியிருந்தது. புதிய ஐ.டி., பூங்கா அந்த நிலையை மாற்ற இந்த முயற்சி எடுக்கப்பட்டுள்ளது. இதன் மூலம், இளைஞர்கள் தங்கள் சொந்த ஊரை விட்டு வெளியேறாமல் வெற்றிகரமான வாழ்க்கையை உருவாக்க முயற்சி எடுக்கப்பட்டுள்ளதாக அரசு தெரிவித்துள்ளது.

சிறப்பம்சங்கள் இத்திட்டம் அரசுக்கு சொந்தமான 21.30 ஏக்கர் நிலப்பரப்பில் அமைய உள்ளது. இது வெறும் அலுவலகக் கட்டடங்களின் தொகுப்பு மட்டுமல்ல; ஒரு முழுமையான மினி-நகரமாக திட்டமிடப்பட்டுள்ளது.

70 சதவீதம் அலுவலகப் பகுதி: நிறுவனங்கள் உடனடியாகப் பணியைத் தொடங்கும் வகையில் பிளக்- அண்ட்- பிளே அலுவலகங்களுக்காக ஒதுக்கப்படும். மீதி 30 சதவீதம் ஊழியர்களுக்கான வீடுகள், வணிக வளாகம், மருத்துவ மையம், வங்கிகள் மற்றும் தீயணைப்பு நிலையம் ஆகியவை இதில் அடங்கும்.

வேலைவாய்ப்பு: அடுத்த 10 ஆண்டுகளில், இந்தச் சிறப்புப் பொருளாதார மண்டலம் சுமார் 30 ஆயிரம் வேலைவாய்ப்புகளை உருவாக்கும் என எதிர்பார்க்கப்படுகிறது. இது மென்பொருள் பொறியாளர்களுக்கு மட்டுமல்லாமல், கட்டுமானம், பராமரிப்பு, பாதுகாப்பு மற்றும் உள்ளூர் சேவைத் துறையில் உள்ளவர்களுக்கும் வேலைவாய்ப்பை வழங்கும்.

வருவாய்: அடுத்த 10 ஆண்டுகளில் ரூ.10 ஆயிரம் கோடி மதிப்பிலான சேவைகளை ஏற்றுமதி செய்யப்படும் என எதிர்பார்க்கப்படுகிறது. இதன் மூலம் கிடைக்கும் வருவாய், புதுச்சேரியின் சாலைகள், குடிநீர் விநியோகம் மற்றும் பள்ளிகளை மேம்படுத்த உதவும்.

விரைவான செயலாக்கம்: இந்த நிலம் ஏற்கனவே உழவர்கரை நகராட்சிக்கு சொந்தமானது என்பதால், நிலம் வாங்குவதில் ஏற்படும் தாமதங்கள் இன்றி இத்திட்டத்தை விரைவாகத் தொடங்க முடியும்.

பசுமைத் திட்டம் புதிய சிறப்புப் பொருளாதார மண்டலம் சுற்றுச்சூழலைக் கருத்தில் கொண்டு வடிவமைக்கப்பட்டுள்ளது. இதன் பெருந்திட்டம் பசுமைக் கட்டட அம்சங்கள், ஸ்மார்ட் கழிவு மேலாண்மை அமைப்புகள் மற்றும் நவீன பயன்பாட்டு நெட்வொர்க்குகளை உள்ளடக்கியது. கனரக தொழிற்சாலைகளுக்குப் பதிலாக ஐடி மற்றும் தொழில்நுட்பத்தில் கவனம் செலுத்துவதன் மூலம், தூய்மையான மற்றும் நவீன முறையில் பொருளாதாரத்தை வளர்க்க இத்திட்டம் வழிவகுக்கும்.