பாரம்பரிய தற்காப்பு கலைகளில் ஒன்றான சிலம்பம் கலையை இளைய தலைமுறையினரிடம் கொண்டும் செல்லும் பணியை இந்திய இளைஞர் பாரம்பரிய சிலம்பம் அசோசியேஷன் மேற்கொண்டுள்ளது. சிலம்பம் கலையை சர்வதேச அளவில் கொண்டு செல்லும் முயற்சியை முன்னெடுத்து வருகின்றது.

அதன் ஒரு பகுதியாக, புதுச்சேரி, கலிதீர்த்தாள்குப்பத்தில் உள்ள மணக்குள விநாயகர் இன்ஸ்டிடியூட் ஆப் டெக்னாலஜி கல்லுாரியில் வரும் 28, 29ம் தேதிகளில் சர்வதேச பாரம்பரிய சிலம்ப சாம்பியன்ஷிப் போட்டியை நடத்த உள்ளது.

இதில் இந்தியா, இலங்கை, மலேசியா, நேபாளம், பூட்டான் உள்ளிட்ட பல்வேறு நாடுகளை சேர்ந்த 6 முதல் 21 வயதிற்கு உட்பட்ட 400க்கும் மேற்பட்ட வீரர்கள் பங்கேற்கின்றனர்.

இவர்களுக்கு 6 வயது முதல் 10 வயது வரை, 10- 14; 14-17; 17-21 வயதினர் என நான்கு பிரிவுகளில் எடை அடிப்படையில் போட்டிகள் நடைபெற உள்ளது.

இப்போட்டியை, வரும் 28ம் தேதி முதல்வர் ரங்கசாமி துவக்கி வைக்கிறார். வி.ஜி.பி., குரூப் சேர்மன் சந்தோஷம், தென்காசி ட்ரஸ்ட் சிலம்ப டிப்ளமோ கல்லுாரி இயக்குனர் திருமாறன், திமோர் அமைதி பல்கலைக்கழக ஆலோசகர் இசாக் பாஸ்கரன், தொழிலதிபர் முகமது இட்ரீஸ் ஆகியோர் சிறப்பு அழைப்பாளராக பங்கேற்கின்றனர்.மணக்குள விநாயகர் கல்விக்குழும தலைவர் தனசேகரன், செயலாளர் நாராயணசாமி, பொருளாளர் ராஜராஜன், கல்லுாரி முதல்வர் மலர்க்கண் ஆகியோர் கலந்து கொள்கின்றனர்.

போட்டி ஏற்பாடுகளை இந்திய இளைஞர் பாரம்பரிய சிலம்பம் அசோசியேஷன் தலைவர் தர்மசாஸ்தா, பொதுச் செயலாளர் வேல்முருகன், ஒருங்கிணைப்பு செயலாளர் சுந்தரவடிவேலன் ஆகியோர் செய்துள்ளனர்.