விழுப்புரம் மாவட்டம், வானுார் வட்டம், திருவக்கரை அருகே உள்ள 300 ஆண்டுகள் பழமையான முத்தாலம்மன் கோவிலில், ஸ்ம்வத்ஸர அபிஷேகம் (ஆண்டு விழா) மற்றும் உலக நன்மை வேண்டி, திருவிளக்கு பூஜை நேற்று விமர்சையாக நடந்தது.

முன்னதாக நேற்று முன்தினம் மாலை 6:00 மணிக்கு அனுக்ஞை, விக்னேஷ்வர பூஜை நடந்தது. தொடர்ந்து நேற்று காலை 6:00 மணி முதல், கோ பூஜை, சூரிய பூஜை, விக்னேஷ்வர பூஜை, கணபதி ஹோமம், நவக்கிரக ஹோமம், வேதபாராயணமும், பூர்ணாஹூதி தீபாராதனை நடந்தது.

காலை 10:00 மணிமுதல் திருவிளக்கு பூஜை துவங்கியது. இதில், 230 பெண்கள் உலக நன்மை வேண்டியும், விவசாயம் செழிக்கவும், தங்களின் மன குறைகள் கலையவும் அம்மனுக்கு பூஜை செய்தனர். தொடர்ந்து, மகா தீபாராதனை நடந்தது.

மாலை 3:00 மணிக்கு ஊரணி பொங்கல் வைத்து தீபாராதனை நடந்தது. இரவு அலங்கரிக்கப்பட்ட வாகனத்தில் , வாண வெடிக்கையுடன் அம்மன் வீதியுலா நடந்தது.

ஸ்ம்வத்ஸர பூஜைகள் மற்றும் திருவிளக்கு பூஜைகளை எடையார் ஞானஸ்கந்த சுவாமி, சந்திரமவுலி ஆகியோர் நடத்தி வைத்தனர். விழா ஏற்பாடுகளை எறையூர் கிராம மக்கள் மற்றும் குல தெய்வ உபயதாரர்கள் செய்திருந்தனர்.