திருபுவனை மேம்பாலம் அருகில் புதிதாக ரெஸ்ட்டோ பார் திறப்பு விழா நேற்று காலை நடந்தது. இது பற்றி தகவல் அறிந்த அப்பகுதி கிராம மக்கள் மற்றும் வி.சி., த.வெ.க., உள்ளிட்ட கட்சி நிர்வாகிகள் நேற்று காலை 11:30 மணியளவில், ரெஸ்ட்டோ பார் திறப்புக்கு எதிர்ப்பு தெரிவித்து, கண்டன ஆர்ப்பாட்டத்தில் ஈடுபட்டனர்.

பின், அங்கிருந்து ஊர்வலமாக சென்று விழுப்புரம் நாகப்பட்டினம் நான்கு வழி சாலையில் திருபுவனை மேம்பாலத்திற்கு கிழக்கே மதியம் 12:00 மணிக்கு திடீர் சாலை மறியல் போராட்டத்தில் ஈடுபட்டனர். அவர்களிடம், திருபுவனை சப் இன்ஸ்பெக்டர் கதிரேசன் மற்றும் போலீசார் பேச்சுவார்த்தை நடத்தி, தகுந்த நடவடிக்கை எடுப்பதாக உறுதி அளித்தனர். அதை ஏற்று, பகல் 2:00 மணிக்கு கிராம மக்கள் போராட்டத்தை கைவிட்டு கலைந்து சென்றனர். இதனால், புதுச்சேரி - விழுப்புரம் தேசிய நெடுஞ்சாலையில் 2 மணி நேரம் போக்குவரத்து பாதித்தது.