மத்திய அமைச்சர் வருகைக்காக, இ.சி.ஆர்., தட்டாஞ்சாவடி ஒழுங்குமுறை கூடம் எதிரே இருந்த 6 மீட்டர் நீளத்திற்கு சென்டர் மீடியனை பொதுப்பணித் துறையின் இடித்து அகற்றி, சிறப்பு வழியை ஏற்படுத்தினர். அந்த வழியாகத் தான் மத்திய அமைச்சர் விழா மேடைக்கு நேராக காரில் வந்திறங்கினார்.

மத்திய அமைச்சரின் பாதுகாப்பு கருதி அவ்வழி ஏற்படுத்தியது, அது அன்றைய நிகழ்ச்சிக்கு அவசியமானதே. இது வரவேற்கதக்கது என்றாலும், விழா முடிந்து 39 நாட்களாகியும், இடித்து அகற்றிய சென்டர் மீடியனை கட்டாமல், நான்கு ஐந்து பேரிகார்டுகளை கொண்டு அடைத்து சமாளித்து வருகிறது.

இரவு நேரங்களில் வாகன ஓட்டிகள், இந்த பேரிகார்டுகளை ஒதுக்கி தள்ளிவிட்டு, இ.சி.ஆரில் குறுக்கே புகுகின்றனர். இதனால் சென்டர் மீடியன் வெட்டப்பட்ட இடத்தில் விபத்து அபாயம் ஏற்பட்டுள்து.

இதனை பார்க்கும் பொதுமக்கள், அதிகாரிகள் சென்டர் மீடியனை இடிப்பதில் காட்டிய வேகத்தை, அதனை கட்டுவதில் காட்டாமல் மெத்தனமாக இருக்கலாமா என, கேள்வி எழுப்பி வருகின்றனர். இடிக்கப்பட்ட சென்டர் மீடியன் விவகாரத்தில், அதேவேகம், அதே பொறுப்பினை பொதுப்பணித் துறையிடம் பொதுமக்கள் எதிர்பார்க்கின்றனர்.