இங்கிலாந்தின் பர்மிங்ஹாமில் ஆல் இங்கிலாந்து பாட்மின்டன் தொடர் நடக்கிறது. பெண்கள் ஒற்றையர் முதல் சுற்றில் உலகத் தரவரிசையில் 16 வது இடத்திலுள்ள இந்தியாவின் சிந்து, 21வது இடத்திலுள்ள தென் கொரியாவின் கா யுன் கிம்மை எதிர்கொண்டார். முதல் செட்டை சிந்து 21-19 என கைப்பற்றினார். அடுத்த செட்டை 13-21 என மோசமாக இழந்தார். வெற்றியாளரை முடிவு செய்ய நடந்த மூன்றாவது, கடைசி செட்டிலும் ஏமாற்றிய சிந்து 13-21 என கோட்டை விட்டார்.

முடிவில் சிந்து 21-19, 13-21, 13-21 என்ற செட்டில் அதிர்ச்சி தோல்வியடைந்தார்.

கலப்பு இரட்டையர் முதல் சுற்றில் இந்தியாவின் ரோகன் கபூர், ருத்விகா ஷிவானி ஜோடி, தைவானின் ஹாங் வெய் இ, நிகோல் கொன்சாலஸ் ஜோடியை சந்தித்தது. முதல் செட்டை 21-10 என வென்ற இந்திய ஜோடி, அடுத்த செட்டை 17-21 என இழந்தது. வெற்றியாளரை முடிவு செய்ய நடந்த மூன்றாவது, கடைசி செட்டை இந்திய ஜோடி 22-20 என போராடி வசப்படுத்தியது.

முடிவில் இந்திய ஜோடி 21-10, 17-21, 22-20 என வெற்றி பெற்று, இரண்டாவது சுற்றுக்குள் நுழைந்தது.

பெண்கள் இரட்டையர் முதல் சுற்றில் இந்தியாவின் அஷ்வினி, தனிஷா ஜோடி, தைவானின் பெய் ஷான், என் ஹாங் ஜோடியை எதிர்கொண்டது. இதில் இந்திய ஜோடி 20-22, 18-21 என போராடி தோல்வியடைந்தது. மற்றொரு போட்டியில் இந்தியாவின் பிரியா, ஸ்ருதி ஜோடி 9-21, 4-21 என தென் கொரியாவின் பயக், சோ லீ ஜோடியிடம் தோற்றது.