இங்கிலாந்தின் பர்மிங்ஹாமில் ஆல் இங்கிலாந்து பாட்மின்டன் தொடர் நடக்கிறது. ஆண்கள் ஒற்றையர் இரண்டாவது சுற்றில் தரவரிசையில் 15வது இடத்திலுள்ள இந்தியாவின் லக்சயா சென், 'நம்பர்-2' வீரரான இந்தோனேஷியாவின் ஜோனாதன் கிறிஸ்டியுடன் மோதினார்.

முதல் செட்டை லக்சயா 21-13 என கைப்பற்றினார். தொடர்ந்து அசத்திய இவர் அடுத்த செட்டையும் 21-10 என எளிதாக வசப்படுத்தினார். 36 நிமிடம் மட்டும் நடந்த போட்டியின் முடிவில் லக்சயா 21-13, 21-10 என்ற நேர் செட்டில் வெற்றி பெற்று, காலிறுதிக்கு முன்னேறினார். ஜோனாதன் கிறிஸ்டிக்கு எதிராக லக்சயா பெற்ற 3வது வெற்றி (4 தோல்வி) இது. அடுத்து காலிறுதியில் சீனாவின் ஷி பெங் லியை ('நம்பர்-6') சந்திக்க உள்ளார்.

இந்தியா விலகல்

ஆண்கள் இரட்டையர் முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி, டென்மார்க்கின் டேனியல், வெஸ்டர்கார்டு ஜோடியை சந்தித்தது. முதல் செட்டை இந்திய ஜோடி 21-17 என கைப்பற்றியது.

தொடர்ந்து இரண்டாவது செட்டையும் 21-15 என எளிதாக வசப்படுத்தியது. முடிவில் இந்திய ஜோடி 21-17, 21-15 என்ற நேர் செட்டில் வெற்றி பெற்றது. இரண்டாவது சுற்றில் சீனாவின் ஜியா, ஜெங் ஜோடியை சந்தித்தது. இதில் 16-21, 2-2 என இருந்த போது, போட்டியில் இருந்து இந்திய ஜோடி விலகியது.

மாளவிகா ஏமாற்றம்

பெண்கள் இரட்டையர் முதல் சுற்றில் இந்தியாவின் திரீஷா, காயத்ரி ஜோடி, 21-17, 21-13 என தைவானின் சியன் யு, ஷூவோ யங் ஜோடியை சாய்த்தது.

பெண்கள் ஒற்றையர் இரண்டாவது சுற்றில் 28 வது இடத்திலுள்ள இந்தியாவின் மாளவிகா, 'நம்பர்-3' வீராங்கனை, ஜப்பானின் யமாகுச்சியை சந்தித்தார். முதல் செட்டை 16-21 என இழந்த மாளவிகா, அடுத்த செட்டையும் 13-21 என நழுவவிட்டார். 33 நிமிடம் மட்டும் நடந்த போட்டியின் முடிவில் மாளவிகா, 16-21, 13-21 என்ற நேர் செட்டில் தோல்வியடைந்தார்.

கலப்பு இரட்டையர் இரண்டாவது சுற்றில் இந்தியாவின் ரோகன் கபூர், ருத்விகா ஷிவானி ஜோடி, 10-21, 12-21 என சீனாவின் பெங், வெய் ஜோடியிடம் வீழ்ந்தது.