சுவிட்சர்லாந்தின் பசல் நகரில் 'சுவிஸ் ஓபன் சூப்பர் 300' பாட்மின்டன் தொடர் நடக்கிறது. ஆண்கள் ஒற்றையர் முதல் சுற்றில் இந்திய வீரர்கள் ஸ்ரீகாந்த், பிரனாய் மோதினர். முதல் செட்டில் இருவரும் மாறி மாறி கேம்களை வசப்படுத்த, ஸ்கோர் 20-20 என இருந்தது. இந்நிலையில் அடுத்தடுத்து அசத்திய ஸ்ரீகாந்த் 23-21 என முதல் செட்டை கைப்பற்றினார்.

அடுத்த செட்டில் 15-18 என பின்தங்கிய ஸ்ரீகாந்த், பின் 23-21 என அசத்தினார். முடிவில் ஸ்ரீகாந்த் 23-21, 23-21 என நேர் செட்டில் வெற்றி பெற்றார்.

மற்றொரு முதல் சுற்றில் இந்தியாவின் சங்கர் முத்துச்சாமி, டென்மார்க்கின் ஜோஹன்னெசனை சந்தித்தார். இதில் சங்கர் முத்துச்சாமி 21-5, 21-16 என எளிதாக வெற்றி பெற்றார்.

இந்தியாவின் ஆயுஷ் ஷெட்டி, ஜப்பானின் நிஷிமோட்டோவுடன் மோதினர். முதல் செட்டை 15-21 என இழந்த ஆயுஷ், அடுத்த செட்டையும் 19-21 என கைவிட்டார். முடிவில் ஆயுஷ் 15-21, 19-21 என்ற செட்டில் தோல்வியடைந்தார்.

அனுபமா வெற்றி

பெண்கள் ஒற்றையர் முதல் சுற்றில் இந்தியாவின் மாளவிகா, கனடாவின் மிட்செல்லி லீயை சந்தித்தார். இதில் மாளவிகா 22-20, 14-21, 19-21 என தோல்வியடைந்தார்.

மற்றொரு முதல் சுற்றில் இந்தியாவின் அனுபமா உபாத்யாயா, சக வீராங்கனை அன்மோல் கார்ப் மோதினர். இதில் அனுபமா 21-14, 21-13 என்ற கணக்கில் வெற்றி பெற்றார். மற்றொரு போட்டியில் இந்தியாவின் இஷாராணி, ஆகர்ஷி பலப்பரீட்சை நடத்தினர். இதில் இஷாராணி, 18-21, 21-17, 22-20 என போராடி வென்றார். இந்தியாவின் ரக்சித்தா ஸ்ரீ, 11-21, 17-21 என்ற கணக்கில் டென்மார்க்கின் கிறிஸ்டோபர்செனிடம் தோல்வியடைந்தார்.

பெண்கள் இரட்டையர் முதல் சுற்றில் இந்தியாவின் திரீஷா, காயத்ரி ஜோடி, சுவிட்சர்லாந்தின் அலைன் முல்லர், நெதர்லாந்தின் கெல்லி வான் ஜோடியை எதிர்கொண்டது. இதில் இந்திய ஜோடி 21-16, 21-17 என்ற நேர் செட்டில் வெற்றி பெற்றது.