தாய்லாந்தின் பாங்காக் நகரில் சர்வதேச பாட்மின்டன் தொடர் நேற்று துவங்கியது. ஆண்கள் இரட்டையர் முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி, இந்தோனேஷியாவின் பகாஸ் மவுலானா, எர்வியான்ஷா ஜோடியை எதிர்கொண்டது.

முதல் செட்டை இந்திய ஜோடி 21-19 என கைப்பற்றியது. இரண்டாவது செட்டில் போராடிய இந்திய ஜோடி 21-23 என நழுவவிட்டது. மூன்றாவது செட் துவக்கத்தில் இருந்து ஆதிக்கம் செலுத்திய இந்திய ஜோடி 21-10 என எளிதாக வசப்படுத்தியது. ஒரு மணி நேரம், 4 நிமிடம் நீடித்த போட்டி முடிவில் இந்திய ஜோடி 21-19, 21-23, 21-10 என வெற்றி பெற்றது.

பெண்கள் ஒற்றையர் தகுதிச்சுற்று முதல் போட்டியில் இந்தியாவின் அனுஷ்கா, 5-21, 7-21 என்ற செட் கணக்கில் தாய்லாந்தின் கெட்கிலியங்கிடம் தோல்வியடைந்தார். ஆண்கள் ஒற்றையர் தகுதிச்சுற்றில் இந்தியாவின் மானவ் சவுத்ரி, 19-21, 18-21 என மலேசியாவின் லி ஜி ஜியாவிடம் வீழ்ந்தார்.

கலப்பு இரட்டையர் பிரிவு தகுதிச்சுற்றில் இந்தியாவின் மோஹித், ரக் ஷிதா ஜோடி 11-21, 18-21 என சீன தைபேவின் பு செங், யு ஹிசுவான் ஜோடியிடம் தோற்றது.