ஜப்பான் தலைநகர் டோக்கியோவில், ‛சூப்பர் 750' அந்தஸ்து பெற்ற ஜப்பான் ஓபன் பாட்மின்டன் தொடர் நடக்கிறது. பெண்கள் ஒற்றையர் பிரிவு முதல் சுற்றில் இந்தியாவின் சிந்து, மலேசியாவின் லிங் சிங் வோங் மோதினர். அபாரமாக ஆடிய சிந்து 21-14, 21-11 என்ற நேர் செட் கணக்கில் வெற்றி பெற்று, இரண்டாவது சுற்றுக்குள் நுழைந்தார்.

கலப்பு இரட்டையர் பிரிவு முதல் சுற்றில் இந்தியாவின் துருவ் கபிலா, தனிஷா கிராஸ்டோ ஜோடி 21-16, 21-14 என்ற நேர் செட் கணக்கில் ஸ்காட்லாந்தின் அலெக்சாண்டர் டன், ஜூலி மாக்பர்சன் ஜோடியை வீழ்த்தியது.

மற்றொரு போட்டியில் இந்தியாவின் ரோகன் கபூர், ருத்விகா ஷிவானி ஜோடி 11-21, 10-21 என, சீனாவின் ஜீ யான் பெங், டங் பிங் ஹுவாங் ஜோடியிடம் தோல்வியடைந்தது.

ஆண்கள் இரட்டையர் பிரிவு முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி, டென்மார்க்கின் டேனியல் லங்கார்ட், மட்ஸ் வெஸ்டர்கார்ட் ஜோடியை சந்தித்தது. முதல் செட்டை 19-21 என இழந்த இந்திய ஜோடி, சாத்விக்சாய்ராஜுக்கு ஏற்பட்ட தோள்பட்டை காயத்தால் பாதியில் விலகியது. டென்மார்க் ஜோடி வெற்றி பெற்றதாக அறிவிக்கப்பட்டது.