சிங்கப்பூரில் சர்வதேச பாட்மின்டன் தொடர் நேற்று துவங்கியது. பெண்கள் ஒற்றையர் முதல் சுற்றில், உலகத்தரவரிசையில் 12வது இடத்திலுள்ள இந்தியாவின் சிந்து, 6வது இடத்திலுள்ள இந்தோனேஷியாவின் வர்தானியை எதிர்கொண்டார். 44 நிமிடம் நடந்த போட்டி முடிவில், சிந்து 21-17, 21-18 என்ற நேர் செட்டில் வெற்றி பெற்று, இரண்டாவது சுற்றுக்குள் நுழைந்தார். மற்றொரு இந்திய வீராங்கனை உன்னதி ஹூடா, 14-21, 10-21 என ஜப்பானின் மியாஜகியிடம் தோல்வியடைந்தார்.

ஆண்கள் ஒற்றையர் முதல் சுற்றில் இந்தியாவின் ஆயுஷ் ஷெட்டி, 21-11, 14-21, 12-21 என கனடாவின் விக்டர் லாயிடம் வீழ்ந்தார்.

இரட்டையரில் அபாரம்

ஆண்கள் இரட்டையர் முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி, அமெரிக்காவின் பிரஸ்லே, சென் ஜி ஜோடியை சந்தித்தது. முதல் செட்டை 26-28 என போராடி இழந்தது இந்திய ஜோடி. பின் அடுத்த இரு செட்டுகளை 21-15, 21-13 என எளிதாக வசப்படுத்தியது. ஒரு மணி நேரம் 15 நிமிடம் நடந்த போட்டியில் இந்திய ஜோடி 26-28, 21-15, 21-13 என்ற கணக்கில் வெற்றி பெற்றது.

மற்றொரு போட்டியில் இந்தியாவின் அம்சகருணன், அர்ஜுன் ஜோடி 15-21, 13-21 என ஜப்பானின் கோகி, கோபயாஷி ஜோடியிடம் தோல்வியடைந்தது.