ஜெர்மனியில், 'சூப்பர் 300' அந்தஸ்து பெற்ற ஜெர்மன் ஓபன் பாட்மின்டன் தொடர் நடக்கிறது. இதன் கலப்பு இரட்டையர் பிரிவு அரையிறுதியில் இந்தியாவின் தனிஷா கிராஸ்டோ, துருவ் கபிலா ஜோடி, இந்தோனேஷியாவின் ரேஹன் குஷார்ஜன்டோ, குளோரியா விட்ஜஜா ஜோடியை சந்தித்தது. முதல் செட்டை 23-25 என போராடி இழந்த இந்திய ஜோடி, பின் எழுச்சி கண்டு 2வது செட்டை 21-10 எனக் கைப்பற்றியது. வெற்றியாளரை நிர்ணயிக்கும் 3வது செட்டில் ஏமாற்றிய இந்திய ஜோடி 15-21 எனக் கோட்டைவிட்டது.

முடிவில் தனிஷா, துருவ் கபிலா ஜோடி 23-25, 21-10, 15-21 என்ற கணக்கில் தோல்வியடைந்து வெளியேறியது.

ஆண்கள் ஒற்றையர் காலிறுதியில் இந்தியாவின் தருண் 21-16, 17-21, 8-21 என பிரான்சின் டோமா ஜூனியர் போபோவிடம் தோல்வியடைந்தார்.

பெண்கள் ஒற்றையர் காலிறுதியில் இந்தியாவின் உன்னதி ஹூடா 21-15, 23-25, 22-24 என ஜப்பானின் ரிகோ குன்ஜியிடம் போராடி வீழ்ந்தார். மற்ற காலிறுதியில் இந்தியாவின் தஸ்னிம் மிர், ரக் ஷிதா ஸ்ரீ தோல்வியடைந்து வெளியேறினர். இத்தொடரில் இந்திய நட்சத்திரங்களின் பங்களிப்பு முடிவுக்கு வந்தது.