கஜகஸ்தானில் சர்வதேச சேலஞ்ச் பாட்மின்டன் தொடர் நடக்கிறது. இதன் பெண்கள் ஒற்றையர் பிரிவு முதல் சுற்றில் இந்தியாவின் மாளவிகா பன்சோத் 22, அன்மோல் கார்ப் 17, மோதினர். அபாரமாக ஆடிய 'நடப்பு தேசிய சாம்பியன்' அன்மோல் 21-13, 22-20 என்ற நேர் செட் கணக்கில் வெற்றி பெற்றார்.

மற்றொரு முதல் சுற்றுப் போட்டியில் இந்தியாவின் அனுபமா உபத்யயா 21-13, 21-13 என சகவீராங்கனை ஹர்ஷிதாவை வீழ்த்தினார். தன்யா ஹேம்நாத் 21-19, 21-10 என சகவீராங்கனை ஐஷானி திவாரியை வென்றார்.

ஆண்கள் ஒற்றையர் பிரிவு முதல் சுற்றில் இந்தியாவின் சங்கர் முத்துசாமி, ஒரிஜித் சாலிஹா மோதினர். இதில் சங்கர் முத்துசாமி 21-13, 19-21, 21-13 என்ற கணக்கில் வெற்றி பெற்றார். மற்ற முதல் சுற்றுப் போட்டிகளில் இந்தியாவின் அனிருத் ஜனார்த்தனன், ரகு மாரிசாமி, தருண், ஆர்யமன் உள்ளிட்டோர் வெற்றி பெற்றனர்.

கலப்பு இரட்டையர் முதல் சுற்றில் இந்தியாவின் ரோகன் கபூர்-ருத்விகா ஷிவானி ஜோடி வென்றது.