சீனாவில் 33வது தாமஸ் கோப்பை (ஆண்கள்), 30வது உபர் கோப்பை (பெண்கள்) பாட்மின்டன் தொடர் நடக்கிறது. இதன் 'சி' பிரிவில் இடம் பெற்ற இந்திய ஆண்கள் அணி முதல் இரு போட்டியில் தாய்லாந்து, இங்கிலாந்து அணியை சாய்த்து, காலிறுதிக்குள் நுழைந்தது. நேற்று தனது கடைசி, மூன்றாவது லீக் போட்டியில் வலிமையான இந்தோனேஷிய அணியை எதிர்கொண்டது.

முதலில் நடந்த ஒற்றையர் போட்டியில் இந்தியாவின் பிரனாய், இந்தோனேஷியாவின் சினிசுகாவை சந்தித்தார். இதில் பிரனாய் 13-21, 21-12, 21-12 என்ற கணக்கில் வெற்றி பெற்றார்.

அடுத்து இந்தியாவின் சாத்விக்சாய்ராஜ், சிராக் ஷெட்டி ஜோடி, இந்தோனேஷியாவின் முகமது பிக்ரி, மவுலானா ஜோடியை சந்தித்தது. முதல் செட்டை 22-24 என இழந்த இந்திய ஜோடி, அடுத்த செட்டை 24-22 என கைப்பற்றியது. மூன்றாவது செட்டை 19-21 என இழந்தது. முடிவில் இந்திய ஜோடி 22-24, 24-22, 19-21 என அதிர்ச்சி தோல்வியடைந்தது.

இரண்டாவது ஒற்றையர் போட்டியில் இந்தியாவின் லக்சயா சென், இந்தோனேஷியாவின் ஜோனாதன் கிறிஸ்டி மோதினர். இதில் லக்சயா 18-21, 21-16, 17-21 என தோல்வியடைந்தார்.

ஆண்கள் இரட்டையர் இரண்டாவது போட்டியில் இந்தியாவின் துருவ் கபிலா, சாய் பிரதீக் ஜோடி, 20-22, 11-21 என இந்தோனேஷியாவின் லியோ ரோலி, டேனியல் ஜோடியிடம் தோற்றது. கடைசியாக நடந்த ஒற்றையர் போட்டியில் இந்தியாவின் ஸ்ரீகாந்த், 21-19, 22-24, 14-21 என சிகோவிடம் வீழ்ந்தார்.

முடிவில் இந்திய அணி 1-4 என தோல்வியடைந்தது.