சீனாவில் 33வது தாமஸ் கோப்பை (ஆண்கள்), 30வது உபர் கோப்பை (பெண்கள்) பாட்மின்டன் தொடர் நடக்கிறது. நடப்பு சாம்பியன் இந்திய ஆண்கள் அணி, காலிறுதியில் வலிமையான சீனாவை சந்தித்தது. முதல் ஒற்றையர் போட்டியில் இந்தியாவின் பிரனாய் (நம்பர்-9), 21-15, 11-21, 14-21 என சீனாவின் யு கு ஷியிடம் ('நம்பர்-2') தோற்றார்.

இரட்டையர் போட்டியில் இந்தியாவின் சாத்விக்சாய்ராஜ், சிராக் ஷெட்டி ஜோடி, 15-21, 21-11, 12-21 என சீனாவின் லியாங், வாங் ஜோடியிடம் அதிர்ச்சி தோல்வியடைந்தது. இரண்டாவது ஒற்றையர் போட்டியில் இந்தியாவின் லக்சயா சென், 13-21, 21-8, 21-14 என சீனாவின் ஷி பெங்கை வென்றார்.

இரண்டாவது இரட்டையர் போட்டியில் இந்தியாவின் துருவ் கபிலா, சாய் பிரதீக் ஜோடி, 10-21, 10-21 என தோற்றது. முடிவில் இந்திய அணி 1-3 என தோற்று வெளியேறியது.

போராடிய பெண்கள்

பெண்கள் காலிறுதியில் இந்தியாவின் இளம் அணி, வலிமையான ஜப்பானை சந்தித்தது. முதல் போட்டியில் 'நம்பர்-53' வீராங்கனை, இந்தியாவின் அஷ்மிதா, 'நம்பர்-11' ஆக உள்ள ஜப்பானின் அயா ஓஹோரியை சந்தித்தார். முதல் இரு செட்டை இருவரும் மாறி மாறி வென்றனர். மூன்றாவது செட்டில் அஷ்மிதா ஒரு கட்டத்தில் 8-3 என முந்தினார்.

கடைசியில் 15-21 என இழந்தார். 63 நிமிடம் நடந்த போராட்டத்தின் முடிவில் அஷ்மிதா 10-21, 22-20, 15-21 என தோற்றார்.

இரட்டையரில் இந்தியாவின் பிரியா, ஸ்ருதி ஜோடி 8-21, 9-21 என தோல்வியடைந்தது. இரண்டாவது ஒற்றையர் போட்டியில் இந்தியாவின் இஷா ராணி, 15-21, 12-21 என முன்னாள் உலக சாம்பியன் ஓகுஹராவிடம் தோற்றார். முடிவில் இந்திய அணி 0-3 என தோல்வியடைந்தது.