இந்தியாவில், சையது முஷ்தாக் அலி டிராபி ('டி-20') 18வது சீசன் நடக்கிறது. ஐதராபாத்தில் நடந்த 'சி' பிரிவு லீக் போட்டியில் பஞ்சாப் அணி (310/5), 112 ரன் வித்தியாசத்தில் பெங்கால் அணியை (198/9) வீழ்த்தியது.

பஞ்சாப் அணியின் அபிஷேக் சர்மா, 52 பந்தில் 148 ரன் (16x6, 8x4) குவித்தார். இப்போட்டியில் 12 பந்தில் அரைசதம் எட்டிய இவர், 32 பந்தில் சதம் விளாசினார். ஒட்டுமொத்த 'டி-20' அரங்கில் அதிவேக அரைசதம் விளாசிய வீரர்கள் வரிசையில் 3வது இடத்தை (தலா 12 பந்து) யுவராஜ் சிங் (இந்தியா), கிறிஸ் கெய்ல் (வெஸ்ட் இண்டீஸ்), ஹஸ்ரதுல்லா ஜஜாய் (ஆப்கன்), சாஹில் சவுகான் (எஸ்தோனியா) ஆகியோருடன் பகிர்ந்து கொண்டார் அபிஷேக். முதலிரண்டு இடங்களில் திபேந்திரா சிங் ஐரி (நேபாளம், 9 பந்து), அஷுதோஷ் சர்மா (ரயில்வேஸ், 11 பந்து) உள்ளனர்.

'டி-20' அரங்கில் ஒரு இன்னிங்சில் அதிக சிக்சர் (16) விளாசிய 2வது இந்திய வீரரானார் அபிஷேக். முதலிடத்தில் புனித் பிஷ்ட் (17 சிக்சர், மேகாலயா, 2021, எதிர்: மிசோராம்) உள்ளார்.

தமிழகம் வெற்றி

ஆமதாபாத்தில் நடந்த 'டி' பிரிவு லீக் தமிழகம், உத்தரகாண்ட் அணிகள் மோதின. 'டாஸ்' வென்ற தமிழக அணி கேப்டன் வருண் 'பீல்டிங்' தேர்வு செய்தார். உத்தரகாண்ட் அணிக்கு யுவராஜ் சவுத்ரி (74) கைகொடுக்க, 20 ஓவரில் 164/6 ரன் எடுத்தது. எட்டக்கூடிய இலக்கை விரட்டிய தமிழக அணிக்கு ராஜ்குமார் (93* ரன், 43 பந்து, 8x6, 6x4) நம்பிக்கை தந்தார். தமிழக அணி 17.1 ஓவரில் 168/5 ரன் எடுத்து 5 விக்கெட் வித்தியாசத்தில் வெற்றி பெற்றது.