ஆஸ்திரேலியா சென்றுள்ள இந்திய அணி, ஐந்து போட்டிகள் கொண்ட 'பார்டர்-கவாஸ்கர்' டிராபி டெஸ்ட் தொடரில் பங்கேற்கிறது. முதல் மூன்று போட்டிகளின் முடிவில் தொடர் 1-1 என சமநிலையில் உள்ளது. நான்காவது டெஸ்ட், வரும் டிச. 26ல் மெல்போர்னில் துவங்குகிறது.

சமீபத்தில் பிரிஸ்பேனில் நடந்த 3வது டெஸ்டில் பங்கேற்ற ஆஸ்திரேலிய வேகப்பந்துவீச்சாளர் ஹேசல்வுட்டின் வலது காலின் பின்புறம் காயம் ஏற்பட்டது. 'ஸ்கேன்' எடுத்து பார்த்ததில் 2 முதல் 3 வாரம் ஓய்வு எடுக்க அறிவுறுத்தப்பட்டுள்ளார். எனவே இவர், இந்தியாவுக்கு எதிரான மீதமுள்ள இரண்டு டெஸ்ட் போட்டியில் இருந்து விலகினார். ஏற்கனவே இவர், அடிலெய்டில் நடந்த பகலிரவு டெஸ்டில் காயம் காரணமாக பங்கேற்கவில்லை.

ஹேசல்வுட்டின் காயம் விரைவில் குணமடையும் பட்சத்தில், அடுத்த மாதம் இறுதியில் நடக்கவுள்ள இலங்கைக்கு எதிரான 2 போட்டிகள் கொண்ட டெஸ்ட் தொடரில் பங்கேற்கலாம்.

இதுகுறித்து ஹேசல்வுட் கூறுகையில், ''காயம் காரணமாக இந்தியாவுக்கு எதிரான டெஸ்ட் தொடரில் இருந்து பாதியில் விலகுவது ஏமாற்றம் அளிக்கிறது. விரைவில் பூரண குணமடைந்து, முழு உடற்தகுதியுடன் போட்டிக்கு திரும்புவதே இலக்கு,'' என்றார்.