டெஸ்ட் அரங்கில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது. பவுலர்களுக்கான தரவரிசையில் இந்திய வேகப்பந்துவீச்சாளர் ஜஸ்பிரித் பும்ரா, 908 புள்ளிகளுடன் 'நம்பர்-1' இடத்தை தக்கவைத்துக் கொண்டார். அடுத்த இரு இடங்களில் ஆஸ்திரேலியாவின் கம்மின்ஸ் (841 புள்ளி), தென் ஆப்ரிக்காவின் ரபாடா (837) தொடர்கின்றனர்.

வெஸ்ட் இண்டீசுக்கு எதிரான முல்தான் டெஸ்டில் 6 விக்கெட் சாய்த்த பாகிஸ்தானின் நோமன் அலி (761), 11வது இடத்தில் இருந்து 9வது இடத்துக்கு முன்னேறினார். ஒரு இடம் பின்தங்கிய இந்திய சுழற்பந்துவீச்சாளர் ரவிந்திர ஜடேஜா (745), 9வது இடத்தை ஆஸ்திரேலியாவின் ஸ்காட் போலண்ட் உடன் பகிர்ந்து கொண்டார்.

பேட்டர் தரவரிசையில் இந்தியாவின் யாஷஸ்வி ஜெய்ஸ்வால் (847) 4வது இடத்தில் தொடர்கிறார். இந்திய விக்கெட் கீப்பர் பேட்டர் ரிஷாப் பன்ட் (739) 9வது இடத்தில் இருந்து 10வது இடத்துக்கு தள்ளப்பட்டார். முதல் மூன்று இடங்களில் இங்கிலாந்தின் ஜோ ரூட் (895), ஹாரி புரூக் (876), நியூசிலாந்தின் வில்லியம்சன் (867) உள்ளனர்.

'ஆல்-ரவுண்டர்' தரவரிசையில் இந்தியாவின் ரவிந்திர ஜடேஜா, 400 புள்ளிகளுடன் 'நம்பர்-1' இடத்தில் நீடிக்கிறார்.