டெஸ்ட் போட்டியில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது. பவுலர்களுக்கான தரவரிசையில் இந்திய வேகப்பந்துவீச்சாளர் ஜஸ்பிரித் பும்ரா 881 புள்ளிகளுடன் 'நம்பர்-1' இடத்தை தக்கவைத்துக் கொண்டார். இந்திய சுழற்பந்துவீச்சாளர் அஷ்வின் (841 புள்ளி) 3வது இடத்தில் நீடிக்கிறார்.

'ஆல்-ரவுண்டர்' தரவரிசையில் இந்தியாவின் ரவிந்திர ஜடேஜா (416 புள்ளி), அஷ்வின் (326) முதலிரண்டு இடங்களில் தொடர்கின்றனர். இந்திய வீரர் அக்சர் படேல் (286) 5வது இடத்தில் நீடிக்கிறார்.

நபி 'நம்பர்-1'

ஒருநாள் போட்டி 'ஆல்-ரவுண்டர்' தரவரிசையில் ஆப்கானிஸ்தானின் முகமது நபி (314 புள்ளி) முதன்முறையாக 'நம்பர்-1' இடத்துக்கு முன்னேறினார். இதன்மூலம் அதிக வயதில் (39 ஆண்டு, ஒரு மாதம்) ஒருநாள் போட்டி 'ஆல்-ரவுண்டர்' தரவரிசையில் முதலிடம் பிடித்த வீரரானார். இதற்கு முன் 2015, ஜூன் மாதம் வெளியான தரவரிசையில் இலங்கையின் தில்ஷன் (38 ஆண்டு, 8 மாதம்) இச்சாதனை படைத்திருந்தார்.

முதலிடத்தில் இருந்த வங்கதேசத்தின் சாகிப் அல் ஹசன் (310) 2வது இடத்துக்கு தள்ளப்பட்டார். இவர், 2019 மே 7 முதல் 'நம்பர்-1' வீரராக (1739 நாட்கள்) வலம் வந்தார்.