ஸ்காட்லாந்து சென்றுள்ள ஆஸ்திரேலிய அணி மூன்று போட்டி கொண்ட 'டி-20' ல் பங்கேற்கிறது. முதல் போட்டி எடின்பரோவில் நடந்தது. முதலில் களமிறங்கிய ஸ்காட்லாந்து அணிக்கு ஜார்ஜ் முன்சே (28), கேப்டன் பெர்ரிங்டன் (23), மாத்யூ கிராஸ் (27) சற்று கைகொடுத்தனர். 20 ஓவரில் 154/9 ரன் எடுத்தது. சீன் அபாட் 3 விக்கெட் சாய்த்தார்.

எளிய வெற்றி

ஆஸ்திரேலிய அணிக்கு பிரேசர் மெக்கர்க் (0), டிராவிஸ் ஹெட் ஜோடி துவக்கம் தந்தது. ஹெட் பவுண்டரி மழை பொழிந்தார். இவர் 17 பந்தில் அரைசதம் விளாசினார். ஆஸ்திரேலிய 'டி-20'ல் அதிவேக அரைசதம் அடித்த வீரர்களில் முதலிடத்தை ஸ்டாய்னிசுடன் (17 பந்து, இலங்கை, 2022) பகிர்ந்து கொண்டார்.

இவர், 25 பந்தில் 80 ரன் எடுத்தார். கேப்டன் மிட்சல் மார்ஷ், 39 ரன் எடுத்தார். ஆஸ்திரேலிய அணி 62 பந்து மீதம் உள்ள நிலையில், 9.4 ஓவரில் 156/3 ரன் எடுத்து, 7 விக்கெட்டில் வெற்றி பெற்றது.

இங்லிஸ் (27), ஸ்டாய்னிஸ் (8) அவுட்டாகாமல் இருந்தனர்.

62 பந்து

சர்வதேச 'டி-20'ல் 150 ரன்னுக்கும் மேற்பட்ட இலக்கை, அதிக பந்து மீதம் உள்ள நிலையில் 'சேஸ்' செய்த அணியானது ஆஸ்திரேலியா. இலக்கை, 62 பந்து மீதம் இருந்த நிலையில் எடுத்தது. முன்னதாக 2021ல் கிரீசின் (157/8) இலக்கை, 43 பந்து மீதம் இருந்த போது ருமேனியா (159/7, 12.5 ஓவர்) எடுத்திருந்தது.

113 ரன்

சர்வதேச 'டி-20'ல் 'பவர்பிளே' ஓவரில் (6) அதிக ரன் எடுத்த இரண்டாவது அணியானது ஆஸ்திரேலியா (113/1 ரன்). 2021ல் ருமேனியா 5.4 ஓவரில் 116/0 (எதிர்-செர்பியா) ரன் எடுத்தது முதலிடத்தில் உள்ளது.

ஹெட் 'முதல்வன்'

'பவர்பிளே' ஓவரில் அதிக ரன் எடுத்த வீரர் ஆனார் ஹெட் (73 ரன்). இதற்கு முன் 2020ல் அயர்லாந்தின் ஸ்டிர்லிங் 67 ரன் (எதிர்-வெஸ்ட் இண்டீஸ்) எடுத்திருந்தார்.

* தவிர, 'பவர்பிளே'யில் அதிக பவுண்டரி அடித்த வீரர் ஆனார் ஹெட் (16). 2018ல் முன்ரோ (நியூசி.,) 14 பவுண்டரி (வெ.இண்டீஸ்) அடித்து இருந்தார்.