டெஸ்ட் அரங்கில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது. இதில் பேட்டர்களுக்கான தரவரிசையில் இந்தியாவின் விராத் கோலி, 737 புள்ளிகளுடன் 10வது இடத்தில் இருந்து 'நம்பர்-8' இடத்துக்கு முன்னேறினார். இந்திய கேப்டன் ரோகித் சர்மா (751 புள்ளி) 5வது இடத்தில் இருந்து 6வது இடத்துக்கு தள்ளப்பட்டார். இளம் இந்திய வீரர் யாஷஸ்வி ஜெய்ஸ்வால், 740 புள்ளிகளுடன் 8 வது இடத்தில் இருந்து 7வது இடத்துக்கு முன்னேறினார்.

பாகிஸ்தானின் பாபர் ஆசம் (734), 3வது இடத்தில் இருந்து 9வது இடத்துக்கு தள்ளப்பட்டார். இங்கிலாந்தின் ஜோ ரூட் (881) 'நம்பர்-1' இடத்தில் நீடிக்கிறார். மற்றொரு இங்கிலாந்து வீரர் ஹாரி புரூக் (758), 4வது இடத்துக்கு முன்னேறினார்.

பவுலர்கள் தரவரிசையில் இந்தியாவின் அஷ்வின், 870 புள்ளிகளுடன் 'நம்பர்-1' இடத்தை தக்கவைத்துக் கொண்டார். மற்ற இந்திய வீரர்களான பும்ரா (847), ரவிந்திர ஜடேஜா (788) முறையே 2, 7வது இடத்தில் தொடர்கின்றனர்.

'ஆல்-ரவுண்டர்' தரவரிசையில் இந்தியாவின் ஜடேஜா (444), அஷ்வின் (322) முதலிரண்டு இடங்களில் நீடிக்கின்றனர்.