தமிழக கிரிக்கெட் சங்கம் சார்பில் புச்சி பாபு கிரிக்கெட் தொடர் நடக்கிறது. திருநெல்வேலியில் நடக்கும் லீக் போட்டியில் மத்திய பிரதேசம், ஜார்க்கண்ட் அணிகள் விளையாடுகின்றன. மத்திய பிரதேச அணி முதல் இன்னிங்சில் 225 ரன்னுக்கு 'ஆல்-அவுட்' ஆனது. பின் முதல் இன்னிங்சை துவக்கிய ஜார்க்கண்ட் அணிக்கு இஷான் கிஷான் (114) கைகொடுக்க முன்னிலை பெற்றது. ஆட்டநேர முடிவில் ஜார்க்கண்ட் அணி முதல் இன்னிங்சில் 277/7 ரன் எடுத்திருந்தது.

ரயில்வே '570': சேலத்தில் நடக்கும் லீக் போட்டியில் இந்தியன் ரயில்வே, குஜராத் அணிகள் விளையாடுகின்றன. முதல் நாள் முடிவில் ரயில்வே அணி 429/6 ரன் எடுத்திருந்தது. நேற்றைய 2ம் நாள் ஆட்டத்தில் ரயில்வே அணியின் சஹாப் யுவராஜ் (105*) சதம் விளாசினார். ரயில்வே அணி முதல் இன்னிங்சில் 570 ரன்னுக்கு 'ஆல்-அவுட்' ஆனது. ஆட்டநேர முடிவில் குஜராத் அணி முதல் இன்னிங்சில் 155/3 ரன் எடுத்திருந்தது.

ஹரியானா '419':கோவையில் நடக்கும் லீக் போட்டியில் ஹரியானா, மும்பை அணிகள் விளையாடுகின்றன. முதல் நாள் முடிவில் 288/6 ரன் எடுத்திருந்த ஹரியானாவுக்கு தீரு சிங் (147) கைகொடுத்தார். ஹரியானா அணி முதல் இன்னிங்சில் 419 ரன்னுக்கு 'ஆல்-அவுட்' ஆனது. இரண்டாம் நாள் முடிவில் மும்பை அணி முதல் இன்னிங்சில் 133/4 ரன் எடுத்திருந்தது.

காஷ்மீர் கலக்கல்: திண்டுக்கல், நத்தத்தில் நடக்கும் லீக் போட்டியில் சத்தீஸ்கர், ஜம்மு-காஷ்மீர் அணிகள் விளையாடுகின்றன. சத்தீஸ்கர் அணி முதல் இன்னிங்சில் 278 ரன் எடுத்தது. சுப்மன் கஜுரியா (147*), அப்துல் சமத் (58), பராஸ் தோக்ரா (73) கைகொடுக்க, ஆட்டநேர முடிவில் காஷ்மீர் அணி 349/4 ரன் எடுத்திருந்தது.