நைஜீரியாவில், ஐ.சி.சி., 'டி-20' உலக கோப்பை 'சப்-ரீஜினல்' ஆப்ரிக்க தகுதிச் சுற்று, 'குரூப்-சி' போட்டிகள் நடக்கிறது. லாகோஸ் நகரில் நடந்த லீக் போட்டியில் நைஜீரியா, ஐவரி கோஸ்ட் அணிகள் மோதின. 'டாஸ்' வென்று முதலில் 'பேட்' செய்த நைஜீரியா அணிக்கு, செலிம் சலாவ் (112) கைகொடுக்க, 20 ஓவரில் 4 விக்கெட்டுக்கு 271 ரன் குவித்தது.

கடின இலக்கை விரட்டிய ஐவரி கோஸ்ட் அணி, 7.3 ஓவரில் 7 ரன்னுக்கு சுருண்டு, 264 ரன் வித்தியாசத்தில் படுதோல்வி அடைந்தது. ஐவரி கோஸ்ட் சார்பில் 6 பேர் 'டக்-அவுட்' ஆகினர். அதிகபட்சமாக ஓட்டாரா முகமது 4 ரன் எடுத்தார். நைஜீரியா சார்பில் ஐசக், உசேனி தலா 3 விக்கெட் சாய்த்தனர்.

மோசமான ஸ்கோர்: சர்வதேச 'டி-20' அரங்கில் ஒரு இன்னிங்சில் குறைந்தபட்ச ஸ்கோரை பதிவு செய்தது ஐவரி கோஸ்ட். இதற்கு முன் மங்கோலியா (எதிர்: சிங்கப்பூர், 2024), ஐல் ஆப் மேன் (எதிர்: ஸ்பெயின், 2023) அணிகள் 10 ரன்னுக்கு 'ஆல்-அவுட்' ஆகின.

தவிர, சர்வதேச 'டி-20' போட்டி வரலாற்றில் அதிக ரன் வித்தியாசத்தில் 3வது சிறந்த வெற்றியை பதிவு செய்தது நைஜீரியா. முதலிரண்டு இடங்களில் ஜிம்பாப்வே (290 ரன், எதிர்: காம்பியா, 2024), நேபாளம் (273 ரன், எதிர்: மங்கோலியா, 2023) அணிகள் உள்ளன.