தேனியில் உள்ள தமிழக கிரிக்கெட் சங்க மைதானத்தில் நடக்கும் 19 வயதுக்குட்பட்டோருக்கான கூச் பெஹார் டிராபி 'சி' பிரிவு லீக் போட்டியில் (நான்கு நாள்) தமிழகம், சத்தீஸ்கர் அணிகள் விளையாடுகின்றன. முதல் நாள் முடிவில் தமிழக அணி முதல் இன்னிங்சில் 211/7 ரன் எடுத்திருந்தது.

இரண்டாம் நாம் ஆட்டத்தில் கிரண் கார்த்திகேயன் (41) கைகொடுக்க தமிழக அணி முதல் இன்னிங்சில் 220 ரன்னுக்கு 'ஆல்-அவுட்' ஆனது. சத்தீஸ்கர் சார்பில் அன்கித் குமார் சிங், தனஞ்ஜெய் நாயக் தலா 3 விக்கெட் வீழ்த்தினர்.

பின் முதல் இன்னிங்சை துவக்கிய சத்தீஸ்கர் அணி 101 ரன்னுக்கு 'ஆல்-அவுட்' ஆனது. பிரதம் (39), கேப்டன் விகல்ப் திவாரி (29) ஆறுதல் தந்தனர். தமிழகம் சார்பில் 'சுழலில்' அசத்திய ஹேம்சுதேஷன் 5 விக்கெட் சாய்த்தார்.

பின் 2வது இன்னிங்சை துவக்கிய தமிழக அணி, ஆட்டநேர முடிவில் 6 விக்கெட்டுக்கு 118 ரன் எடுத்து 237 ரன் முன்னிலை பெற்றிருந்தது. கிரண் கார்த்திகேயன் (61) அவுட்டாகாமல் இருந்தார்.