மலேசியாவில், 19 வயதுக்குட்பட்ட பெண்கள் அணிகளுக்கான ஐ.சி.சி., 'டி-20' உலக கோப்பை 2வது சீசன் நடக்கிறது. 'நடப்பு சாம்பியன்' இந்தியா, ஆஸ்திரேலியா உள்ளிட்ட 16 அணிகள், 4 பிரிவுகளாக லீக் சுற்றில் விளையாடுகின்றன.

கோலாலம்பூரில் நடந்த 'ஏ' பிரிவு லீக் போட்டியில் இந்தியா, வெஸ்ட் இண்டீஸ் அணிகள் மோதின. 'டாஸ்' வென்ற இந்திய அணி 'பீல்டிங்' தேர்வு செய்தது.

வெஸ்ட் இண்டீஸ் அணிக்கு அசாபி (12), கெனிகர் கசார் (15) ஆறுதல் தந்தனர். கேப்டன் சமாரா ராம்நாத் (3), பிரியானா (0) உள்ளிட்ட மற்றவர்கள் ஏமாற்றினர். வெஸ்ட் இண்டீஸ் அணி 13.2 ஓவரில் 44 ரன்னுக்கு 'ஆல்-அவுட்' ஆனது. இந்தியா சார்பில் பருனிகா சிசோடியா 3, ஆயுஷி சுக்லா, ஜோஷிதா தலா 2 விக்கெட் சாய்த்தனர்.

சுலப இலக்கை விரட்டிய இந்திய அணிக்கு கமலினி, சானிகா சல்கே ஜோடி கைகொடுத்தது. 4.2 ஓவரில் ஒரு விக்கெட்டுக்கு 47 ரன் எடுத்து வெற்றி பெற்றது. கமலினி (16), சானிகா (18) அவுட்டாகாமல் இருந்தனர்.