இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. கேரளாவின் கொச்சியில் நடந்த லீக் போட்டியில் கேரளா, பெங்களூரு அணிகள் மோதின. ஆட்டத்தின் 8வது நிமிடத்தில் பெங்களூருவின் ஜார்ஜ் பெரேரா தியாஸ் ஒரு கோல் அடித்தார். இதற்கு, 'ஸ்டாப்பேஜ்' நேரத்தில் (45+2வது நிமிடம்) கேரளாவுக்கு கிடைத்த 'பெனால்டி' வாய்ப்பில் ஜீசஸ் ஜிமினெஸ் ஒரு கோல் அடித்து பதிலடி கொடுத்தார். முதல் பாதி 1-1 என சமநிலையில் இருந்தது.

இரண்டாவது பாதியின் 74வது நிமிடத்தில் பெங்களூருவின் எட்கர் மென்டஸ் ஒரு கோல் அடித்து கைகொடுத்தார். தொடர்ந்து அசத்திய இவர், 'ஸ்டாப்பேஜ்' நேரத்தில் (90+4வது நிமிடம்) மீண்டும் ஒரு கோல் அடித்தார். கேரளா அணியினரால் கூடுதலாக கோல் அடிக்க முடியவில்லை. ஆட்டநேர முடிவில் பெங்களூரு அணி 3-1 என்ற கோல் கணக்கில் வெற்றி பெற்றது.

பெங்களூரு அணி 6 போட்டியில், 5 வெற்றி, ஒரு 'டிரா' என 16 புள்ளிகளுடன் முதலிடத்தில் நீடிக்கிறது. இரண்டாவது தோல்வியை பெற்ற கேரளா அணி, 8 புள்ளிகளுடன் 6வது இடத்தில் உள்ளது.