இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. பெங்களூருவில் நடந்த லீக் போட்டியில் பெங்களூரு, ஐதராபாத் அணிகள் மோதின. ஆட்டத்தின் 5வது நிமிடத்தில் பெங்களூருவின் ராகுல் பேகே ஒரு கோல் அடித்தார். இதற்கு ஐதராபாத் அணியினரால் பதிலடி தர முடியவில்லை. முதல் பாதி முடிவில் பெங்களூரு அணி 1-0 என முன்னிலையில் இருந்தது.

இரண்டாவது பாதியின் 85வது நிமிடத்தில் பெங்களூரு அணிக்கு கிடைத்த 'பெனால்டி' வாய்ப்பில் கேப்டன் சுனில் செத்ரி ஒரு கோல் அடித்தார். தொடர்ந்து அசத்திய இவர், 'ஸ்டாப்பேஜ்' நேரத்தில் (90+4வது நிமிடம்) மீண்டும் ஒரு கோல் அடித்து கைகொடுத்தார். கடைசி வரை போராடிய ஐதராபாத் அணியினரால் ஒரு கோல் கூட அடிக்க முடியவில்லை.

ஆட்டநேர முடிவில் பெங்களூரு அணி 3-0 என வெற்றி பெற்றது. முதல் போட்டியில் ஈஸ்ட் பெங்கால் அணியை வீழ்த்திய பெங்களூரு அணி, தொடர்ச்சியாக 2வது வெற்றியை பதிவு செய்தது.