சர்வதேச கால்பந்து கூட்டமைப்பு ('பிபா') சார்பில், பெண்கள் அணிகளுக்கான 'பிபா' சீரிஸ் தொடர் முதன் முறையாக நடத்தப்படுகிறது. பல்வேறு கண்டங்களை சேர்ந்த அணிகள் பங்கேற்கின்றன. பிரேசில், ஐவரி கோஸ்ட், தாய்லாந்து, கென்யா என நான்கு இடங்களில் தொடர் நடக்கின்றன. ஒவ்வொரு தொடரிலும் 4 அணிகள் இடம் பெற்றுள்ளன.

கென்யாவில் நடந்த தொடரில் ஆஸ்திரேலியா (15வது இடம்), இந்தியா (67), கென்யா (133), மலவாய் (153) அணிகள் பங்கேற்றன. முதல் அரையிறுதியில் இந்திய அணி, 0-2 என கென்யாவிடம் தோற்றது. ஆஸ்திரேலியா 5-0 என மலவாயை வீழ்த்தியது.

நேற்று நடந்த மூன்றாவது இடத்துக்கான போட்டியில் அரையிறுதியில் தோற்ற இந்தியா, மலவாய் அணிகள் மோதின. கேப்டனாக ஷில்கி களமிறங்கினார். இந்திய அணிக்கு அஸ்தம் (19 வது நிமிடம்), அவேகா (45+1) கோல் அடித்தனர். மறுபக்கம் குமலோ (43), தேபோரா (60) கோல் அடிக்க, ஸ்கோர் 2-2 என இருந்தது. போட்டியின் 84 வது நிமிடத்தில் பிரியதர்ஷினி (தமிழகம்) ஒரு கோல் அடிக்க, இந்தியா 3-2 என்ற கணக்கில் வெற்றி பெற்று, மூன்றாவது இடம் பிடித்தது.