இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. ஜாம்ஷெட்பூரில் நடந்த லீக் போட்டியில் ஜாம்ஷெட்பூர், சென்னை அணிகள் மோதின. ஆட்டத்தின் 6வது நிமிடத்தில் ஜாம்ஷெட்பூர் அணியின் பிரதிக் பிரபாகர் சவுத்தரி 'சேம்சைடு' கோல் அடித்தார். துவக்கத்தில் இருந்து ஆதிக்கம் செலுத்திய சென்னை அணிக்கு இர்பான் யாத்வத் (22வது நிமிடம்), கானர் ஜான் ஷீல்ட்ஸ் (24வது) தலா ஒரு கோல் அடித்து கைகொடுத்தனர். முதல் பாதி முடிவில் சென்னை அணி 3-0 என முன்னிலையில் இருந்தது.

இரண்டாவது பாதியில் மீண்டும் அசத்திய சென்னை அணிக்கு வில்மர் ஜோர்டான் கில் (54வது நிமிடம்), லுாகாஸ் பிரம்பிலா (71வது) தலா ஒரு கோல் அடித்து வலுவான முன்னிலை பெற்றுத்தந்தனர். தொடர்ந்து போராடிய ஜாம்ஷெட்பூர் அணிக்கு 81வது நிமிடத்தில் கிடைத்த 'பெனால்டி' வாய்ப்பில் ஜாவி ஹெர்னாண்டஸ் ஒரு கோல் அடித்து ஆறுதல் தந்தார்.

ஆட்டநேர முடிவில் சென்னை அணி 5-1 என்ற கோல் கணக்கில் 3வது வெற்றியை பதிவு செய்தது. சென்னை அணி, 7 போட்டியில், 3 வெற்றி, 2 'டிரா', 2 தோல்வி என 11 புள்ளிகளுடன் 6வது இடத்துக்கு முன்னேறியது.