இந்தியன் சூப்பர் லீக் (ஐ.எஸ்.எல்.,) கால்பந்து 10வது சீசன் இறுதிக்கட்டத்தை எட்டியுள்ளது. கோல்கட்டாவில் உள்ள சால்ட் லேக் மைதானத்தில் இன்று நடக்கும் பைனலில் 'நடப்பு சாம்பியன்' மோகன் பகான், மும்பை சிட்டி அணிகள் மோதுகின்றன.

இம்முறை லீக் சுற்றில் 15 வெற்றி, 3 'டிரா', 4 தோல்வி என 48 புள்ளிகளுடன் முதலிடம் பிடித்த மோகன் பகான் அணி முதன்முறையாக ஐ.எஸ்.எல்., ஷீல்டு வென்றது. அடுத்து நடந்த அரையிறுதியில் ஒடிசா அணியை வென்று மூன்றாவது முறையாக (2020-21, 2022-23, 2023-24) பைனலுக்கு முன்னேறியது.

சமீபத்தில் கோல்கட்டாவில் நடந்த லீக் போட்டியில் 2-1 என மும்பை அணியை வீழ்த்திய மோகன் பகான் மீண்டும் ஆதிக்கம் செலுத்தினால் தொடர்ந்து 2வது முறையாக ஐ.எஸ்.எல்., சாம்பியன் ஆகலாம்.

லீக் சுற்றில் 14 வெற்றி, 5 'டிரா', 3 தோல்வி என 47 புள்ளிகளுடன் 2வது இடம் பிடித்த மும்பை அணி, அரையிறுதியில் கோவா அணியை வீழ்த்தி 2வது முறையாக (2020-21, 2023-24) பைனலுக்குள் நுழைந்தது. கடந்த 2020-21 சீசன் பைனலில் மோகன் பகானை வீழ்த்திய உற்சாகத்தில் மும்பை அணி உள்ளது. மீண்டும் அசத்தினால் தனது 2வது ஐ.எஸ்.எல்., பட்டம் வெல்லலாம்.