இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. டில்லியில் நடந்த லீக் போட்டியில் பஞ்சாப், ஐதராபாத் அணிகள் மோதின. ஆட்டத்தின் 35வது நிமிடத்தில் பஞ்சாப் அணியின் விடல், ஒரு கோல் அடித்தார். இதற்கு ஐதராபாத் அணியினரால் பதிலடி கொடுக்க முடியவில்லை. முதல் பாதி முடிவில் பஞ்சாப் அணி 1-0 என முன்னிலை பெற்றிருந்தது.

இரண்டாவது பாதியில் மீண்டும் அசத்திய பஞ்சாப் அணிக்கு 71வது நிமிடத்தில் பிலிப் மிர்ஸ்ல்ஜாக் ஒரு கோல் அடித்தார். கடைசி நிமிடம் வரை போராடிய ஐதராபாத் அணியினரால் ஒரு கோல் கூட அடிக்க முடியவில்லை. ஆட்டநேர முடிவில் பஞ்சாப் அணி 2-0 என்ற கணக்கில் வெற்றி பெற்றது. முதலிரண்டு போட்டியில் கேரளா, ஒடிசா அணிகளை வீழ்த்திய பஞ்சாப் அணி, தொடர்ச்சியாக 3வது வெற்றியை பதிவு செய்தது.