ஸ்பெயினின் மாட்ரிட் நகரில், உலக கோப்பை வில்வித்தை ('ஸ்டேஜ் 4') தொடர் நடக்கிறது. பெண்கள் அணிகளுக்கான 'காம்பவுண்டு' பிரிவு பைனலில் இந்தியா, சீனதைபே மோதின. ஜோதி சுரேகா, பர்னீத் கவுர், பிரித்திகா பிரதீப் அடங்கிய இந்திய அணி 225-227 (57-57, 58-56, 55-56, 55-58) என்ற கணக்கில் தோல்வியடைந்து வெள்ளிப்பதக்கத்தை கைப்பற்றியது.

ஜோதி 'ஹாட்ரிக்': கலப்பு அணிகளுக்கான 'காம்பவுண்டு' பிரிவு 3-4வது இடத்துக்கான போட்டியில் இந்தியா, எல் சால்வடார் மோதின. ஜோதி சுரேகா, ரிஷாப் யாதவ் அடங்கிய இந்திய அணி 156-153 (39-39, 38-36, 39-39, 40-39) என வெற்றி பெற்று வெண்கலப்பதக்கத்தை தட்டிச் சென்றது.

பெண்கள் தனிநபர் 'காம்பவுண்டு' பிரிவு பைனலில் இந்தியாவின் ஜோதி சுரேகா, பிரிட்டனின் எல்லா கிப்சன் மோதினர். இதில் ஜோதி 147-148 என தோல்வியடைந்து வெள்ளி வென்றார். இது, இத்தொடரில் ஜோதி கைப்பற்றிய 'ஹாட்ரிக்' பதக்கம் (2 வெள்ளி, ஒரு வெண்கலம்) ஆனது.