உலக கோப்பை வில்வித்தை தொடர் சீனாவின் ஷாங்காய் நகரில் நடக்கிறது. நேற்று காம்பவுண்டு பிரிவு போட்டிகள் நடந்தன. பெண்கள் அணிகளுக்கான பைனலில் இந்தியாவின் ஜோதி, அதித்தி, பர்னீத் கவுர் கூட்டணி, இத்தாலியை சந்தித்தது. இதில் இந்தியா 236-225 என வெற்றி பெற்று தங்கம் கைப்பற்றியது

ஆண்கள் அணிகளுக்கான பைனலில் இந்தியாவின் அபிஷேக் வர்மா, பிரியான்ஷ், பிரதமேஷ் கூட்டணி, நெதர்லாந்து அணியை 238-231 என்ற கணக்கில் சாய்த்து, இரண்டாவது தங்கம் வென்றது.

கலப்பு அணிகளுக்கான பைனலில் இந்தியாவின் ஜோதி, அபிஷேக் ஜோடி, 158-157 என எஸ்தோனியாவின் ராபின், லிசெல் ஜோடியை வீழ்த்தி, தங்கம் வென்றது.

மீண்டும் ஜோதி

பெண்களுக்கான தனிநபர் காம்பவுண்டு பைனலில் ஜோதி, மெக்சிகோவின் ஆன்ட்ரியா மோதினர். ஸ்கோர் 146-146 என சமன் ஆனது. பின் 'ஷூட் ஆப்' முறையில் வெற்றி பெற்ற ஜோதி, இத்தொடரில் 'ஹாட்ரிக்' தங்கம் கைப்பற்றினார்.

ஆண்கள் தனிநபர் காம்பவுண்டு பைனலில் இந்திய வீரர் பிரியான்ஷ் 147-150 என ஆஸ்திரியாவின் வியனரிடம் வீழ்ந்து, வெள்ளி வென்றார். இந்தியா இதுவரை 4 தங்கம், ஒரு வெள்ளி வென்றுள்ளது.