அமெரிக்காவில் உலக கோப்பை வில்வித்தை ('ஸ்டேஜ் 1') தொடர் நடந்தது. ஆண்கள் அணிகளுக்கான 'ரிகர்வ்' பிரிவு பைனலில் இந்தியாவின் அடானு தாஸ், திராஜ் பொம்மதேவரா, தருண்தீப் ராய் இடம் பெற்ற அணி, சீனாவுடன் மோதியது.

முதல் செட் 54-54 என சமன் ஆனது. அடுத்த செட்டை சீனா 58-55 என கைப்பற்றியது. மூன்றாவது செட்டில் சற்று தடுமாறிய இந்திய அணி 54-55 என கோட்டை விட்டது. முடிவில் இந்திய அணி 1-5 என்ற (54-54, 55-58, 54-55) கணக்கில் தோல்வியடைந்து, வெள்ளிப்பதக்கம் கைப்பற்றியது.

திராஜ் வெண்கலம்

தனிநபர் ஆண்களுக்கான ரிகர்வ் பிரிவு அரையிறுதியில் இந்தியாவின் திராஜ் பொம்மதேவரா, ஜெர்மனியின் புளோரியன் அன்ரக் மோதினர். இதில் திராஜ் 1-7 என தோல்வியடைந்தார்.

இதையடுத்து நடந்த வெண்கலப் பதக்கத்துக்கான போட்டியில் திராஜ், ஸ்பெயினின் ஆன்ட்ரியஸ் மெடியலை எதிர்கொண்டார். முதல் மூன்று செட் முடிவில் திராஜ் 2-4 என பின்தங்கினார். அடுத்த இரு செட்டில் அசத்திய இவர், 6-4 என வெற்றி பெற்ற, வெண்கலப் பதக்கம் கைப்பற்றினார்.

இத்தொடரில் இந்திய அணி 1 தங்கம், 1 வெள்ளி, 2 வெண்கலம் என மொத்தம் 4 பதக்கம் வென்றது.