சீனாவின் ஹுலுன்பியுரில் 8வது ஆசிய சாம்பியன்ஸ் டிராபி ஹாக்கி தொடர் நடக்கிறது. 6 அணிகள் பங்கேற்கின்றன. தனது முதல் மூன்று போட்டியில் வெற்றி பெற்ற இந்திய அணி, அரையிறுதிக்கு முன்னேறியது. நேற்று தனது நான்காவது போட்டியில் தென் கொரியாவை எதிர்கொண்டது.

போட்டியின் 8 வது நிமிடத்தில் இந்திய இளம் வீரர் அராய்ஜீத் சிங் ஒரு பீல்டு கோல் அடித்தார். அடுத்த நிமிடம் இந்தியாவுக்கு 'பெனால்டி கார்னர்' வாய்ப்பு கிடைத்தது. இதை கோலாக மாற்றினார் கேப்டன் ஹர்மன்பிரீத் சிங். தென் கொரியாவுக்கு கிடைத்த 'பெனால்டி கார்னர்' வாய்ப்பில் யாங் இகுன் கோல் அடித்தார்.

முதல் பாதியில் இந்தியா 2-1 என முன்னிலை பெற்றது. இரண்டாவது பாதியில் 43வது நிமிடம் கேப்டன் ஹர்மன்பிரீத் சிங், 'பெனால்டி கார்னர்' வாய்ப்பில் ஒரு கோல் அடித்தார். முடிவில் இந்திய அணி 3-1 என்ற கணக்கில் வெற்றி பெற்றது.

இந்திய அணி 12 புள்ளியுடன் பட்டியலில் முதலிடத்தில் உள்ளது. நாளை பாகிஸ்தானை சந்திக்க உள்ளது.

200 கோல்

தென் கொரியாவுக்கு எதிராக 2 கோல் அடித்த இந்திய அணி கேப்டன் ஹர்மன்பிரீத் சிங், ஹாக்கி அரங்கில் 200 கோல் அடித்த, மூன்றாவது இந்தியர், சர்வதேச அளவில் 12வது வீரர் ஆனார். 228 போட்டியில் இவர் 201 கோல் அடித்துள்ளார். இந்தியாவின் மேஜர் தயான் சந்த் (185 போட்டி, 570 கோல்), பல்பிர் சிங் சீனியர் (61ல் 246 கோல்) முதல் இரு இடத்தில் உள்ளனர்.