டில்லியில், பெண்களுக்கான ஆசிய ஹேண்ட்பால் சாம்பியன்ஷிப் 20வது சீசன் நடக்கிறது. லீக் சுற்றில் இந்திய அணி 'பி' பிரிவில் 3வது இடம் பிடித்தது. இதில் 5-8வது இடத்துக்கான போட்டியில் இந்தியா, சிங்கப்பூர் அணிகள் மோதின. முதல் பாதி முடிவில் இந்திய அணி 20-14 என முன்னிலையில் இருந்தது. தொடர்ந்து அசத்திய இந்திய அணி, ஆட்டநேர முடிவில் 35-22 என்ற கணக்கில் வெற்றி பெற்றது. இந்தியா சார்பில் பிரியங்கா தாகூர், குல்ஷன் சர்மா, பாவனா தலா 6, ஷாலினி தாகூர் 5 புள்ளி பெற்றனர்.

மற்றொரு போட்டியில் சீன அணி 38-14 என்ற கணக்கில் ஹாங்காங்கை வீழ்த்தியது. 5வது இடத்துக்கான போட்டியில் (டிச. 10) இந்தியா, சீனா அணிகள் மோதுகின்றன.