பஹ்ரைனின் மனாமா நகரில் ஆசிய யூத் விளையாட்டு நடக்கிறது. 40 நாடுகளின் 8000க்கும் மேற்பட்ட நட்சத்திரங்கள் பங்கேற்கின்றனர். பெண்களுக்கான கபடி பைனலில் நேற்று இந்தியா, ஈரான் மோதின. முதல் பாதியில் இந்தியா 33-12 என முன்னிலை பெற்றது. இரண்டாவது பாதியிலும் ஆதிக்கம் செலுத்திய இந்தியா, 75-21 என வெற்றி பெற்று, தங்கம் கைப்பற்றியது. யூத் ஆசிய விளையாட்டில் இந்தியாவுக்கு கிடைத்த முதல் தங்கம் இது.

ஆண்கள் அபாரம்

கபடியில் இந்திய ஆண்கள் அணி, பங்கேற்ற 5 போட்டியிலும் வென்று பைனலுக்கு முன்னேறியது. இதில் 35-32 என ஈரானை வென்று, தங்கம் கைப்பற்றியது.

ரஞ்சனா 'வெள்ளி'

பெண்களுக்கான 5000 மீ., ஓட்டத்தில் இந்தியாவின் ரஞ்சனா 24 நிமிடம், 25.88 வினாடி நேரத்தில் வந்து, வெள்ளிப்பதக்கம் வென்றார். ரியா நான்காவது இடம் பிடித்தார்.

* ஆண்களுக்கான 'டேக்வாண்டோ' தனிநபர் பூம்சே பிரிவில் இந்தியாவின் தேபாஷிஸ் தாஸ், அரையிறுதியில் 8.5100-8.5400 என சீனாவின் ஜிஜுவானிடம் தோற்க, வெண்கலப் பதக்கம் கிடைத்தது.

* கலப்பு இரட்டையர் அரையிறுதியில், இந்தியாவின் யாஷ்வினி, ஷிவான்ஷு ஜோடி (8.1200-8.5600), தாய்லாந்தின் இன்ஜங், நிடிக்கான் ஜோடியிடம் தோற்க, இந்தியாவுக்கு வெண்கலம் கிடைத்தது. இதுவரை இந்தியா 2 தங்கம், 2 வெள்ளி, 5 வெண்கலம் என 9 பதக்கம் வென்று, பட்டியலில் 5 வது இடத்தில் உள்ளது.