ரூர்கேலா (ஒடிசா), ராஞ்சியில் (ஜார்க்கண்ட்) ஆண்களுக்கான ஹாக்கி இந்தியா லீக் 6வது சீசன் நடக்கிறது. லீக் சுற்றின் முடிவில் புள்ளிப்பட்டியலில் முதல் நான்கு இடங்களை பிடித்த பெங்கால் (19 புள்ளி), சூர்மா (19), ஐதராபாத் (18), தமிழகம் (18) அணிகள் அரையிறுதிக்கு முன்னேறின.

முதல் அரையிறுதியில் தமிழகம், பெங்கால் அணிகள் மோதின. இப்போட்டி 2-2 என சமன் ஆனது. தமிழகம் சார்பில் நாதன் எப்ராம்ஸ் (18 வது நிமிடம்), செல்வம் கார்த்தி (32வது) தலா ஒரு கோல் அடித்தனர். பெங்கால் அணிக்கு பர்தீப் சிங் சாந்து (30வது நிமிடம்), சாம் லேன் (53வது) கைகொடுத்தனர்.

வெற்றியாளரை முடிவு செய்ய 'பெனால்டி ஷூட் அவுட்' நடந்தது. இரு அணிகளுக்கும் தலா 5 வாய்ப்பு வழங்கப்பட்டன. முடிவில் போட்டி மீண்டும் 2-2 என சமநிலையில் நீடித்தது. இதையடுத்து 'சடன்டெத்' முறையில் தமிழக அணி 5-6 என அதிர்ச்சி தோல்வியடைந்தது. பெங்கால் அணி முதன்முறையாக பைனலுக்குள் நுழைந்தது.